Famoso Bodyguard Internacional Deo Fluonia liber di tur acusacion

Siman cu ta tras di lomba tabatin sentencia den e caso di e homber Deo Fluonia, conoci como bodyguard, kende Ministerio Publico a acusa di violacion sexual, un hecho cu ta data di 2018, y secuestro di un homber (2019), un ex militar.

Hues a cuminsa pa bisa di biaha na e acusado cu e no ta haya ningun di e acusacionnan proba y a splica Fluonia e motibonan.

Pa Corte no a keda proba cu Fluonia a stroba e ex militar di papia cu su Abogado. Fluonia a compaña un señora pa hiba e papelnan di su divorcio pa e ex militar. Pero tampoco a proba cu el a menasa e homber cu e mester bay keda na un hotel, unda el a bay bahe despues cu e homber a recoge su pañanan na unda cu e tabata biba cu su ex casa. E hecho cu el a stroba e homber di bay cerca su ex casa no ta nifica cu el a secuestr’e.

E muhe den su declaracionnan duna a bisa cu e tin masha miedo di e homber pasobra e ta un ex militar.

Pa loke ta e violacion, no tin prueba tampoco. Fluonia di prome instante a keda nenga di a viola e muhe, ni relacion sexual e tabatin cu ne. Tabata palabra solamente di e denunciante y no tin otro prueba. Ademas, e declaracion di e denunciante ta contradictorio. Prome el a bisa di a wordo viola pa un homber desconoci cu kende el a bay na e beach. E homber supuestamente a pidie pa bay cu ne na e beach pa busca algo. Pero den e siguiente declaracion, e ta bisa cu e sa ken e persona ta, esta un bodyguard. No tin prueba cu e acusado tabata riba e beach tampoco.

Segun por a compronde, Fluonia ta bandonando Aruba e fin di siman aki. E ta hopi decepciona di hopi lucha cu e mester a hiba ultimo añanan, y contratemponan cu el a pasa aden. E lo bay traha den exterior.