Rulienne Arends durante entrevista a splica, cu diparti di FADA hopi biaha nan tin e parti di duna conseho, sea ta un hoben of famia cu ta bin pa un otro persona, unda cu ta indica nan, dependiendo cua ta e droga cu e persona ta usando.
Kico ta e peliger di esaki, kico ta e consecuencia corto y na largo plaso pa nan por wak esaki.
Si nan ta desea ayudo, di biaha ta tuma contacto cu CAA, unda cu nan tin nan plannan pa duna e guia pa loke ta sea e hoben of e adulto.
Tin di bisa cu hopi scol ta traha hopi di cerca cu CAA, unda cu varios scol ta haci drugtest y na unda cu si e hoben sali positivo, nan ta bay e ora na CAA unda cu nan tin cu tuma tanto sesion y e hoben tin cu keda clean durante e sesionnan aki.
Pero e ta bay su scol normal y parti merdia e ta bay su sesionnan. FADA ta duna e conseho, unda cu tin mester. Ta papia cu nan. Algo cu ta dificil pa haci ta pa bisa e hoben pa no haci’e, pasobra ta e ora bo ta mand’e pa e bay haci’e. Ta para keto riba e peliger cu tin su tras y sa tin persona cu awor aki tin dificultad pa recupera di adiccion, ta papia cu e hobennan tambe.
Una bes purba
FADA ta haya diferente caso. Tin algun cu ta casonan cu mayornan a caba di haya sa cu e yiu ta usa por ehempel. E yiu ta admiti por ta cu e tin algun luna ta usa, por ta el a purba djis un biaha so.
Tur caso ta diferente. Nunca ta haya casonan similar. Cada un hoben ta diferente. Pero mayoria cu ta haya ta hobennan cu ya tin un tempo ta usa caba. Esey ta unda cu ta para kedo. FADA ta brinda e yudansa. Tin hoben ta bisa cu ta un biaha a usa pa test y no kier us’e nunca mas. Nan ta un tiki mas conciente riba e parti di e peliger.
Pero un biaha mas, e ta varia pa hoben. Ta haya hobennan cu ta usa pa un periodo largo caba. Algun ta recien nan a cuminsa us’e y hasta haya hobennan cu mayornan ta djis preocupa, mirando e amistadnan cu nan yiu tin y nan no kier pa e yiu bay usa.
Tambe ta haya unda cu e hobennan ta admiti, cu nan no ta usa, pero esnan rond di dje si. E casonan semper ta diferente, segun Arends.
