Famia ta respeta cu hues lo tuma mas tempo pa studia e caso di Wayaca

Awe a tuma luga e caso di e asesinato na Wayaca. Awe mainta Hues a dicidi cu nan no ta dicta sentencia awe. Durante e tratamento di e caso, famianan di tanto e victima, como tambe di e sospechosonan Stevie y Jefferson tabata tey.

Dos siman pasa fiscal a pidi un castigo di 25 aña pa ambos sospechoso. Ta un Chines y un Boneriano. Loke tin cu agrega cu tur hende tabata pendiente pa e sentencia. Loke por bisa cu no tin un sentencia. Hues a dicidi cu ta bay habri e caso bek pa atende algun punto cu tin di haber cu e caso. Ta pesey mes ministerio publico a manda un informacion y den e caso aki ta bisa cu hues mester mas informacion di e situacion financiero di Stevie. E caso ta bay bek hues comisario. Orden lo mester bay na banco pa duna informacion tocante di Stevie for di October 2015 pa December 2016. Ta informacionnan cu a haya for di Ministerio Publico entre otro.

Tambe un testigo mas lo wordo yama como tambe e tata di Stevie. E caso lo sigui dia 20 di April pa 8’or y mey di mainta.

Yiu muhe di e dama asesina, Elaine Fong, a comenta cu nan a spera un veredicto awe. E no ta un shock, pasobra hues a bisa cu ta bay habri e caso atrobe pasobra tin cierto cosnan cu p’e no ta duidelijk ainda y kier un investigacion riba e parti ey, cual ta e parti di e cuentanan di Stevie, unda cu Jefferson ta bisa cu el a wordo manda pa bay haci atraco, pasobra tabata tin mester di placa, pero segun pruebanan, cu Stevie tin placa. Hues ta pidi mas investigacion pa wak si e ta complice, of si no tin nada di haber. Pa e famianan awor aki e tension ta hopi grandi pasobra ta un shock, no a spera esaki.

Solamente hues a hiba palabra. E caso no a dura hopi, mas of menos un 10 minuut. Hues a splica e parti unda a declara cu e Boneriano a wordo manda pasobra Stevie tabata tin mester di placa, pasobra tin cu cumpra ekiponan di afo. Awo Stevie ta comproba cu e tin placa riba su cuenta, dus e no tin e necesidad pa haci esey. Hues kier mas investigacion pa mira kico ta e problema aki.

Elaine Fong no tin idea cu lo tabata un ke otro yamada pa China, mirando e caso aki. E victima ta su mama, tur hende cu lo tabata den su sapato lo a haci mesun cos.

Ni 100 aña ta suficiente pa e caso aki. Pero leynan mester ta mas fuerte y ahusta. 25 pa 30, e ta trece un alivio chikito, pero ta bay biba cu esaki pa semper y ainda no sa kico ta bay ta e resultado. Pasobra awo ta bin un otro parti cu tin cu bay investiga algo otro, cu no a spera at all.

E castigo

Elaine Fong ta spera cu e castigo ta mas cu 25 y no menos.

Segun e ruman homber di Elaine Fong, Chi Wai Fong, no por haci nada pa loke ta e decision di hues. Mester acepta e decision. E ta pidi mas claridad, mester respeta esey. Chi Wai ta spera cu esaki no por desvia e castigo. Por ta e hues kier mas claridad, pero por ta e ta mas siguransa pa e hues pa e tuma su decision. For di hopi punto di bista por mira decision di hues. Di parti di famia, tin cu gewoon respeta. Manera cu a respeta e caso di cuminsamento. No por haci nada, tin cu gewoon acepta esey.

Reaccionnan despues

Fiscal a pidi un castigo y famianan a haya reaccion di comunidad. Tur dia nan ta haya reaccion. Tur hende ta pidi e maximo castigo. Tur hende ta bisa cu e castigo ta mucho abao pa loke a pasa, pero no por haci nada. Esey ta loke ley ta. Si nan ta di acuerdo of no, mester acepta loke ley ta.

E tata

Fisicamente e tata ta bon. Pero por imagina mescos cu Chi Wai y su ruman muhe, ningun hende no por mira den e cabes di e otro familiar. Fisicamente e tata ta hopi bon. Pero mentalmente nan ta herida y lo ta herida pa resto di nan bida di e cos aki.

Sosten

Danki na tur esnan cu a bin duna sosten, famia, conocinan y tambe tin hopi hende cu no a yega y no lo yega corte, pero toch ta cu e famia. Chi Wai ta gradici cada un di nan pa nan sosten.

No sa si sentencia lo cay riba e fecha aki, aunke cu fiscal a pidi caba. Pa e famia lo ta un noticia kico lo pasa riba e dia aki. Ta pidi pa tur hende tin pasenshi. Ta un aña y mey a pasa, casi dos aña. Hopi tempo a pasa caba. Awor aki e ultimo paar di lunanan cu lo tin cu bay warda, ta pidi tur hende pa djis tene pasenshi y tin fe cu husticia lo prevalece.