Diamars mainta un mayor hopi preocupa a comparti su storia cu comunidad. Javier Mujica a baha su yiu chikito na Colegio Pastoor Kraanwinkel awe mainta pa un rato despues haya yamada di e cabesante pa regresa y busca e yiu bek na scol pasobra e no tin cupo na e scol ey mas, cu nan a kita e mucha for di e scol y lamentablemente e no por keda riba tereno di scol. Motibo di esaki ta cu tin “schoolgeld” habri. Asombra Mujica a regresa y busca su yiu na scol. A presenta na SKOA pa por haya informacion riba e situacion tumando luga. Aki nan a splica cu tin varios aña escolar cu ta habri (2017-2018-2019 y aña escolar nobo).
Preocupacion di mas grandi ta si su yiu di berdad ta bay keda sin educacion. Javier ta conta cu for di luna di juni e ta den contacto (via e-mail) cu Natasha Tromp di SKOA, caminda tabata purba yega na un areglo di pago. Na prome instante no tabata mustra di tin ningun problema pero despues a drenta informacion cu pa motibo di 3 aña habri di schoolgeld e mucha no ta permiti di forma parti di e aña escolar nobo. Mesora nan a bay busca na cas pa wak si ta haya recibo nan di pago, mientrastanto SKOA a tuma contacto atrobe pa avisa cu a haya e pagonan atrasa pero faltando pago di 2017-2018.
Sin prueba pa e aña escolar atrasa ey, no a keda otro opcion pa acorda di paga via un areglo. Javier a ofrece di pone un suma di afl.25,= riba e suma di afl. 75,= pa asina cubri e sumi atrasa y e aña escolar nobo pa por garantisa e yiu su derecho di ricibi educacion. No a tuma luga! Ta trata di un suma di Afl. 325,= total cu tin atrasa. Despues di no haya niun contesta mas cu SKOA (Natasha Tromp) for di fecha di 28 di augustus, awe ta haya e noticia desagradabel cu su yiu no tin scol pe.
Javier Mujica a mustra riba un documento cu el a ricibi di SKOA pa haya ayudo via Rode Kruis pa e aña escolar tanten pasobra pa e aña aki e no ta posibel pa e drenta e scol menciona. Den tur e situacion cu e comunidad ta pasando aden door di Covid-19, Javier tambe ta un cu a perde su trabou. For di luna di maart no tin entrada mas. A aplica pa FASE y a keda warda te cu 27 di juni ora nan a tuma contacto cu ne pa avis’e cu su cuenta di banco ta blokia. Lo duna algun ora pa regla esaki pa por pasa e placa di FASE p’e. Pa motibo di cuentanan restrasa CMB a blokia e carchi y a informa cu lo keda blokia. Un suplica a bay pa wak si por haci un excepcion humanitario pa e por ricibi ayudo di FASE pero e banco a nenga rotundamente. A busca alternativa cu otro banco caminda Aruba Bank despues di hopi esfuerso a coopera y ta den proceso. Mientrastanto a yega fecha di 8 di september y te dia di awe no a ricibi nada.
Javier Mujica ta haci un peticion na e comunidad, na esnan cu conoce pa brinda un aporte si e ta den boso forsa pasobra nan ta den un situacion hopi duro na e momentonan aki. Por tuma contacto cu n’e na telefoon 565-7198. Como no tabata suficiente su lucha no ta caba eynan, den tur e dificultad cu nan ta pasando aden e doño di apartament cu nan ta kedando aden ta pidi pa nan desaloha e vivienda pa algun tempo caba. E ta haci un esfuerso maximo pa yega na un suma tur luna pa sikiera algo. E tin cu paga afl.750,= pero no ta alcansa pero ta duna locual cu e ta logra cu ta entre afl.350 cu afl.400 ( locual cu e por ) cu yudansa di su mama/ruman y su amigonan. Pero cada fecha di pago e situacion ta escala pasobra e doño no kier tende mas di e suma minimo aki y ta pidi pa e busca un caminda di bay. Segun Javier e ta fasil pa bis’e cu e tin cu bay , pero situacion ta hopi dificil eyfo, tin cu paga huur nobo cu ta inclui e borg y fuera e ta sin trabou. Practicamente imposibel.
Javier ta duna nomber di e personanan aki mirando cu luna pasa tabata tin un discucion bastante fuerte dilanti cas y si tin cualkier insidente e ta laga e denuncia publico aki pa asina si cualkier cos pasa, pa tur hende ta informa cu ta na defensa di su yiunan e ta sali pa no laga nan riba caya. Javier tin mas di 23 aña bibando riba Aruba y sa su derchonan. Nomber di e doñonan ta Marielys y Fabian situa na Hato #2.
