Famia completo contagia cu Covid-19 a yega hospital

Varios ambulance a bay cas di famia Tromp situa den Vioolstraat na Dakota pa algun hende cu a bira hopi malo. Ta un mama cu su yiunan, tur cu sintoma di Covid-19. Na tur tin 10 hende bibando den e cas, di cual 7 a bira hopi malo pa cual a interna 5 di nan den hospital y 2 di nan a bay den unidad di cuido intensivo!

Na e momento aki ta investigando con e virus a yega e cas aki y a pega tur hende pareu y duna tur hopi sintoma pareu! Esaki ta locual ta considera un “kluster” ora cu tin hopi hende ta contagia bou di e mesun dak. Ta obvio cu no ta tumando e medidanan di precaucion necesario den cas, cu a haci cu tur a contagia otro awo.

Ironico ta cu e personal medico cu mester a yega cu urgencia hospital awe nochi pa atende e pashentnan, a topa cu trafico mal pega na altura di Linear Park, cu centenares di hende riba pia manera den un fiesta. Ta nota cu ainda hopi hende no ta tuma e consecuencianan di Covid-19 na serio y ta burla di e reglanan anuncia. Ta e mesun tipo di actitud di hobennan asina na Hulanda a causa cu awe e pais ta den un semi-lockdown, cu un cantidad di contagio atrobe!

Na Aruba ta tumando un actitud comosifuera nos a cura di e virus aki caba. Mescos ta creando un impresion eroneo cu maneho di cifranan di contagio. Por ehempel ta menciona cu no tin pashent contagia cu Covid-19 mas den unidad di cuido intensivo. Aunke cu berdad e pashentnan a cura di e virus, toch tin tres pashent ainda den ICU cu a drenta cu e virus pero cu a keda atras cu complicacion serio. Por lo menos dos di nan ta luchando pa nan biba!

Bisando esaki, ta hopi necesario pa sigui riba un alerta pisa, tumando tur medida di precaucion posibel. Evita aglomeracion pasobra ta tuma un solo hende contagia, pa pega un grupo di hende cu e virus. Y aunke cu bou di e hobennan mayoria bez e sintomanan sa ta hopi suave, bou di e grandinan e ta percura pa complicacionnan pisa cu por resulta hasta fatal.