Faltando algun dia pa su reintroduccion: Comerciante no sa nada di AruParking

Si tin algo cu tin e comerciantenan den caya grandi preocupa, ta e regreso di AruParking. Nos ta algun dia leu di e introduccion di e pagamento pa parkeo den caya grandi. Tin hende ta sinti cu no a duna suficiente informacion.

Frank Tieleman, comerciante den caya grandi, a duna di conoce cu e ta pro pa un parkeo organisa. Den cualkier centro di ciudad mester organisa esaki mirando cu e tin un beneficio pa e cumprado y e comerciante. E reintroduccion di un sistema di parkeo organisa ta necesario.

E forma

Locual tin Frank Tieleman preocupa ta cu no tin mucho informacion ni pa e comerciante ni tampoco pa e cumprado. Ta promove pa hende bin Oranjestad pa parkeer. Como consumido, Tieleman no ta compronde e logica mirando cu mayoria negoshi den caya ta cerando door cu situacion ta basta malo. 

Otro cos ta cu no tin e demanda pa parkeo. E hendenan cu ta haciendo uzo di parkeo ta esnan cu ta traha den caya. Falta hopi informacion ainda. Frank Tieleman a continua bisando cu ta promove pa hende bay cumpra den caya pero no tin luga pa shop pues no tin necesidad pa parkeo tampoco.

No tin informacion

Di otro banda, tampoco a informa comerciante debidamente. No a informa ni tampoco involucra e comerciantenan den e reintroduccion di AruParking. Por ehempel, locual Tieleman sa, ta locual e ta mira riba Facebook. Como comerciante el a tuma nota cu tur vak di parkeo a bira blanco pero e no sa kico a sosode cu esunnan geel. Como consumido, por tuma nota cu tin masha hopi mashin ta “out of order” pues no sa con lo soluciona esaki.

Ademas, tin hende ta pensa cu e reintroduccion di AruParking lo “spanta” e tiki cliente cu a resta pa caya grandi. Frank Tieleman ta di pensamento cu comunicacion ta importante pasobra si e comerciante sa kico lo bin cu ne, e lo por adapta y ahusta. Te cu awo ta promove unicamente e consumido pero e consumido mes no tin tur informacion. 

Mashin ta daña!

No ta tur hende tin credit card tampoco. Ademas tin hende cu no tin pay.aw tampoco si en caso e mashin no ta funciona. Esaki ta e cosnan cu ta haci e mercado mas chikito ainda. No ta conoci si e intencion ta pa tur hende cuminsa busca un credit card of pay.aw. Pues, si e mashin no ta traha ta con e hendenan lo tin di paga?

En general, e comerciantenan tin varios aña ta yora e malcontento di con mal organisa e sistema di parkeo den caya ta. Esun cu ta ehecuta e parkeo tin cu busca un manera di informa e comerciantenan di kico nan lo haci. 

Mester genera interes

Si wak bon, parkeo ta necesario pero si no tin hopi comerciante/tienda den caya, no ta mira e motibo dicon e necesidad di paga pa parkeo. Mester cuminsa analisa e e problema di centro di ciudad for di e punto di bista cu tin cu cuminsa for di patras bin dilanti. Ta imposibel pa haci esaki si no tin necesidad di parkeo. Mester cuminsa busca forma pa genera interes den comerciante pa haci negoshi den caya y despues genera interes pa e consumido bay den caya y automaticamente lo tin necesidad pa parkeo. E interes ey ta locual no tin awo!