Awe ta dia di Asuncion y no ta custumber cu riba e dia aki tin actividad politico. Sinembargo, ta haci excepcion cu pueblo por sigui sostene e ultimo dos partidonan cu nan firma. Awe ta e di cuater dia pa partidonan cu no tin representacion den parlamento haya firma. Te na e momentonan aki tin dies partido, esta MEP, AVP, POR, RED, Accion 21, MAS, UPP, PPA, RAIZ y Pueblo PROME, cu ta bay eleccion. Pero ainda falta dos partido mas cu CURPA y HTC.
Te cu awo HTC a yega 527 y esey ta nifica cu nan falta 61 firma. Di otro banda CURPA a yega 288 y esey kiermen nan falta 299 firma. Ambos partido ainda ta pidi pa pueblo pasa na un di e loketnan, esta MFA Noord, MFA Savaneta y dependance di Censo, y deposita nan firma p’asina nan por bay eleccion 2021.
