No obstante cu dialuna ultimo, dia 11 di november, den oranan di merdia el a nenga rotundamente cu tin un caso penal contra dje, toch a resulta cu ta asina mes ta! Parlamentario Luigi Bergen ta sospechoso di a bati su yiu muhe den cas y Fiscal a manda yame otro siman dia 19 di november pa 11:00am pa un “Officierzitting”. Ey lo atende e miembro di Parlamento como sospechoso di a maltrata su mesun yiu muhe malamente den cas.
Mester menciona cu e Parlamentario no ta integro pasobra el a nenga dialuna ainda den un entrevista cu Raymond “Baboe” Hoek na e emisora Power FM di Minister Otmar Oduber, cu no tin ningun caso contra dje. Tambe el a bisa cu berdad su (ex) señora a keh’e na Polis pero cu Fiscal a “seponeer” e caso. E unico motibo cu el a bay Corte ta pa atende su caso di divorcio y proximamente pa alimentacion di su yiunan y reparticion di bienes. Riba dje, el a hasta comenta di a keha su señora bek na Recherche pa “smaad”, esta difamacion.
Pero Parlamentario Bergen no por a imagina su mes cu un dia despues, Fiscal mr. Yolanda Pronk, a manda cit’e pa presenta otro siman na Ministerio Publico. Su caso ta registra bou di “Parketnummer: P2019-15002”. E Fiscal a referi na e Parlamentario como “verdachte van het plegen van mishandeling van zijn kind, gepleegd op of omstreeks de periode van 1 oktober 2018 tot en met 31 januari 2019”.
No ta conoci ki posicion Rocco Tjon lo tuma awo, siendo Lider di Fraccion di MEP, sabiendo cu su colega no a papia berdad cune y cu ta un sospechoso di violencia domestico. Con partido MEP ta papia di Crisisplan Social asina tanto, si den cas mes tin un colega cu ta parti di e problema social den comunidad. Esaki specialmente despues cu e mesun yiu muhe di e Parlamentario a duna su testimonio riba 24ora.com con su tata a bati’e y core cune for di cas. Tambe cu su tata ta haciendo tur lo posibel via Voogdijraad pa baha e alimentacion di su yiunan for di 950 florin pa luna pa 350 florin pa luna.
Luigi Bergen tabata consciente cu e tin caso contra dje pero a opta pa no papia berdad y toch asumi su funcion di Parlamentario. Ata awor ta resulta cu e lo mester presenta dilanti Fiscal pa tuma un castigo. Den caso cu e no kier e tipo di areglo aki, e lo mester bay Corte publico pa atende e caso. Pero un Parlamentario condena pa violencia domestico ta bira dificil pa por sigui den e funcion aki, por lo menos eticamente y moralmente.
