Ta desde December 2016 cu miembro di Parlamento di MEP, Dangui Oduber, a start e proceso pa cambia nos ley electoral den cual politiconan cu mas voto ta drenta Parlamento. Cu esey e factor “number riba lista” ta bira menos importante. Pero, aunke cu a presenta e proposicion di cambio di ley dia 28 di maart 2017, toch e ley no a pasa y awo ta nota problema den partidonan cu representacion den Parlamento.
Pa cuminsa, e falta di ley aki ta causa problema den e mesun partido MEP mes, pasobra un figura hoben y dinamico manera Dr. Arthur Vallejo, cu tabata # 29 riba lista di MEP a logra no menos di 972 voto den su prome salida. Esey ta HOPI mas cu mayoria candidato cu awor si lo drenta Parlamento. Asina tin un candidata nobo, por ehempel Daphne Lejuez cu ta drenta Parlamento cu apenas 196 voto, pasobra el a haya un number suficiente halto pa drenta Parlamento. Di otro banda, pa Dr. Vallejo por drenta Parlamento, no ta solamente Lejuez, sino 28 candidato lo mester move y nenga e stoel di Parlamento pa e por haya un chens. Lamentablemente no tin e boluntad politico pa duna e hoben aki un chens pa profila y crece den politica.
Den AVP e storia no ta diferente. A presenta e 9 candidatonan caba, cu ta desde 1 te 12 pasobra 3 candidato a nenga nan stoel den Parlamento, esta Eman, Schwengle y Visser. AVP ta uza number sagradamente pa drenta Parlamento, mientras cu otro candidatonan cu basta voto, manera Gerlien Croes, Clayton Croes y Melvin Tromp ta keda afor. Den e fraccion di AVP tin candidato manera Michael Lampe # 11 cu a logra no mas cu 118 voto cu lo haya su stoel di Parlamentario. Di otro banda, pa Gerlien Croes por drenta, cu su 982 votonan, ta 17 candidato lo mester keda sin tuma nan stoel pa e por yega na dje.
Riba lista di POR e situacion ta diferente. Ey e candidatonan a firma un protocol den cual nan mes ta bay di acuerdo pa permiti e candidatonan cu mas voto drenta Parlamento. Bisando esey, si sali for di e punto di bista cu Otmar Oduber y Andin Bikker lo drenta Parlamento, e siguiente dos candidatonan cu mas voto ta Marisol Lopez-Tromp cu 497 voto y Alvin “Allan” Howell cu 461 voto pa yena e dos asientonan den Parlamento. Den e caso aki, abogado Joselin Croes, apesar di ta # 4 riba lista, no lo drenta Parlamento pasobra el a logra solamente 238 voto. Ta bon pa aclaria si cu e protocol firma den POR no tin ningun balor legal, sino mas bien un acuerdo di amigo. Si acaso Croes para riba, e lo drenta Parlamento y Howell lo keda afo. Ta cos di mira awor si e acuerdo firma na Fort Zoutman lo tin e balor cu e politiconan a priminti prome cu eleccion.
Cu e retonan cu awe ta bibando den MEP, AVP y POR, ta importante pa liderazgo di partidonan analisa e deseo di e pueblo votado pa realisa si mester haci e cambio den ley of no. E cambio lo kita hopi poder di e lider di partido, cu awor ta esun cu ta dicidi number di cada candidato. Den futuro, si e ley di Dangui Oduber pasa, numbernan ta bira obsoleto pasobra ni obstante na ki posicion Bo ta riba lista, ta depende di cantidad di voto cu Bo lo logra drenta Parlamento.
