“E aña aki ta di recuperacion y importante pa crea posibilidadnan y oportunidadnan nobo. Pa logra crea oportunidadnan nobo mester trata y aproba algun ley ainda den parlamento di Aruba”, asina minister Dangui Oduber a anuncia awe. For di hopi tempo ministerio di salud ta trahando riba e proceso di legalisacion y cultivacion di cannabis medicinal. Pa cu esaki a haci cambionan y a adapta e Landsverodening Verdovende middelen.
E cambionan di e ley pa permiti cultivacion, importacion y exportacion di cannabis medicinal ta cla y ta na caminda pa parlamento. Asina e ley aki yega parlamento lo mester debati riba dje pa por yega na un votacion pa aproba e cambionan di e ley aki. “Esunnan cu realmente kier diversifica nos economia y crea oportunidadnan nobo lo mester bay di acuerdo pa aproba e cambionan aki”, asina Minister Dangui Oduber a vocifera awe. Ta teme cu no ta tur 21 parlamentario lo aproba pa e cambio di ley aki, pa evita cu e ta habri un otro porta cu kisas comunidad no ta desea.
Otro ley cu tambe mester ta na caminda pa parlamento ta e ley di TPEF. Lo mester trata e presupuesto aki dentro di poco. E fondonan pa TPEF lo ta hopi limita debi na e consecuencia di e pandemia. E sla den nos turismo a pone cu e entradanan a conoce un reduccion drastico.
