Diaranson anochi a tuma luga na MFA Santa Cruz un presentacion di FADA hunto cu Amigo Didi. Lions Club a invita FADA, hunto cu Fundacion Zinia, riba e concientisacion di core auto bao di influencia.
Hunto cu Fundacion Zinia, nan a duna un presentacion na esnan presente. Fundacion Zinia a haci nan parti di conta kico ta amigo Didi y con e cooperacion ta hunto cu FADA y tambe FADA a haci e parti di concientisacion y e parti di kico ta e consecuencianan lo por sosode na momento cu ta bao di influencia di alcohol.
Actividadnan andando
Den e temporada aki, ya cu nos ta na final, FADA ta hopi bezig cu e concientisacion den e scolnan. Ta bezig cu nan carousel, hunto cu otro fundacionnan pa trece e concientisacion pa e hobennan.
Conseho
Conseho na e pueblo di Aruba ta, ban rustig durante e ultimo dianan di carnaval. Gos’e sanamente, no mester abusa di alcohol pa por disfruta di dje. Y si bo bebe, no stuur y percura pa bo tin bo amigo Didi.
Proyecto di Bus #Amigo Didi
Gilbert Croes, presidente di fundacion Zinia, a splica cu nan ta bezig cu e proyecto di #AmigoDidi. Pa Carnaval a bin cu e proyecto di e bus di Amigo Didi. E carnavalistanan cu tin pensa di bay carnaval y bay usa alcohol, nan por yama pidi servicio y por hiba y trece nan bek cas, sano y salbo, sin ningun problema.
Croes a splica cu e fundacion tin tres aña y mey existiendo. Nan tin diferente meta y un di e prome metanan ta pa concientisa e comunidad di Aruba pa uzo di alcohol den trafico.
P’esey ta uzando e lema di #Amigo Didi. Amigo Didi ta en realidad e Designated Driver, esta e DD. Semper ta bisa cu ta entre amigo bo ta sali y amigonan mester por cuida otro den ora di salimento asina.
Un amigo lo por hibami cas si ami ta bao di influencia di alcohol. No necesariamente semper e mester ta e mesun amigo. E biaha aki ta uno, e siguiente biaha ta un otro.
Esey ta e prome meta di e fundacion.
Nan otro meta ta pa duna sosten na e mayornan cu a perde un yiu hoben, den forma tragico. Esta yuda nan den ayudo spiritual, ayudo social, etc., pa overcome e tragedia cu nan a pasa aden.
E di tres meta cu Fundacion Zinia tin, ta pa bin cu cambionan den ley pa cuenta di uzo di alcohol den trafico.
Eseynan ta e tres metanan cu tin. Ainda ta druk bezig cu nan prome meta, cual ta concientisa e comunidad di Aruba riba uzo di alcohol den trafico.
Campaña
Fundacion Zinia a bin cu e campaña di e Bus Amigo Didi. Tabata tin’e basta tempo pensa, pero logisticamente tabata tiki dificil pa por a haci’e.
Ta cu e carnavalistanan cu kier bay, tine planea cu nan sa cu nan ta bay bebe, por a tuma contacto cu e fundacion via Facebook of telefon. E ora ta regla con ta busca na un punto. Si nan tin un grupo grandi, ta busca nan, hiba nan carnaval y trece nan bek cas, na e mesun punto. For di eynan lo a pidi pa e mesun familiarnan, busca e persona ey hib’e cas.
No ta kere den e idea di mi cas ta dos minuut leu, y ta core e pida ey. Cerca mes e accidente por sosode.
Fundacion Zinia kier haci e 70% y ta laga e 30% den man di e famia of amigonan. Esey tabata un iniciativa pa concientisa e hendenan. Tin di bisa cu e demanda ta halto. A cuminsa cu un bus. Pa e fin di siman aki lo tin hasta 4 bus coriendo. Tin hopi hende conciente, tin hopi hende cu kier haci e diferencia y esey ta e parti great cu nan ta mira den dje.
