Den e situacion cu Aruba ta den dje na e momentonan aki Fundacion Anti Droga Aruba (FADA) tin cu cambia su strategia con normalmente nan ta brinda informacion na comunidad.
Aworaki nan no tin e plataforma di semper pa yega cerca e muchanan na scol, of grandinan via nan trabou. Loke FADA ta bezig cun’e ta videonan di informacion pa conscientisa por ehempel si ta haci uzo di alcohol den e temporada di e crisis aki.
Esakinan ta hisa e factornan ora ta papia di COVID-19, segun Ruliënne Arends di FADA. A mira na diferente pais ta hayando problema cu e uzo di alcohol y esakinan ta subiendo drasticamente. Ta mirando na Aruba cu esey no ta kedando afo y hopi casonan ta biniendo padilanti, por ehempel problemanan domestico. Algun di nan alcohol ta hungando un factor den dje. A haya informacion for di WHO cu uzo di alcohol tin efecto riba e sistema di persona, unda ta uza alcohol mas di loke un hende ta custumbra y esaki tin efecto riba salud.
Door di uzo di alcohol y ta sufri di algo, e chensnan di haya coronavirus por ta hopi mas halto. Si un hende test positivo pa coronavirus y cu e uzo di alcohol of substancia, ta bay haci cu e problema di pulmonnan ta mas serio compara cu esnan no ta uza alcohol of droga. E ta hunga un rol grandi pa loke ta e parti respiratorio di un persona.
FADA a cuminsa cu e prome video cu ta di alcohol, poniendo un tiki enfasis riba uzo di alcohol y kico ta e tipnan cu por duna tambe. A pone e video riba diferente media y lo pasa esaki na TeleAruba pa esnan cu no tin un Facebook por mira e informacion aki. Otro siman lo bin cu informacion di droga, tambe lo bay tin di gaming y ta preparando segmento di movemento. Esakinan ta seccionnan importante na e momentonan aki di e crisis. Segun Arends, personanan cu ta haci uzo di alcohol frecuentemente, personanan cu ta uza droganan ilegal, humamento, nan curpa ta mas vulnerabel ora ta papia di e virus si haya contacto cu esaki.
E fundacion ta preparando p’e informacion yega comunidad. Nan ta ricibiendo hopi mensahe y yamada di preocupacion di comunidad, principalmente riba e uzo di alcohol cu ta mas visibel compara cu droga. Tambe muchanan ta hopi atento. Hopi hoben a tuma contacto cu FADA pa informacion pa spreekbeurt. FADA ta eyfo pa brinda e servicio cu semper a haci, pero na un manera ful diferente.
E mensahenan y yamadanan ricibi di hende preocupa riba kico nan por haci di un familiar cu a cuminsa por ehempel uza alcohol un tiki mas of personanan cu ta uza mas droga. Personal di FADA ta papia cu nan y duna conseho. CAA no ta ricibi niun hende pero ta atende nan via telefon. Na momento cu FADA haya personanan cu e preocupacionnan aki, ta conseha nan ki pa haci tambe ta duna number di CAA pa haya yudansa cu mester. Ta hopi importante cu mester corda cu ta den un situacion cu hendenan tin miedo, tin stress, no sa kico ta bay pasa aki par di luna, no tin entrada financiero y no sa con pa deal cu e situacion. Esey ta pone cu uzo di substancianan ta bay crece. Tur hende ta haci esaki diferente manera haci sesionnan di happy hour via diferente aplicacion pa distrai. A lo largo esaki tin su consecuencianan na momento cu e curpa ta custuma di un bebemento regularmente y e lo ta dificil pa adapta bek na e sistema anterior.
Arends a bisa cu loke nan a pensa riba dje ta cu mayoria hende ta trahando for di cas, por ta a dicidi despues di trabou pa dal un par di bebida alcoholico un tiki mas. Mester tene na cuenta cu e dia siguiente no tin ken pa controla si e persona a lanta wayaba of burachi y no tin un dunado di trabou pa controla. Loke cu por pasa ta na momento cu e situacion drecha y tur hende por bay bek na nan sistema, e persona a custuma di bebe tur atardi y no tin preocupacion cu e siguiente dia niun hende t’ey pa controla y mester cambia e rutina bek lo ta uno dificil. Esey ta unda mester para keto y haya mas persona bira adicto. E por pasa unda cu lo ta dificil pa algun hende bay bek na nan rutina normal.
FADA tin su Facebook page y ta hopi conoci, y ta ricibi constantemente mensahenan. Esaki ta haci cu ta mas facil pa yega cerca nan. Ta hopi importante pa ta consciente riba e peligernan di alcohol sea droga por tin riba un persona. Ya tin e riesgonan pa salud y awo e ta mas halto mirando e situacion cu tin.
