E aña academico na Universidad di Aruba a inicia y ariba diabierna ultimo FHTMS a organisa e prome “Dean’s List Breakfast”. Un evento pa reconoce studiantenan cu a destaca academicamente den cada semester di nan estudio. E programa ta consisti di seis semester cual ta representa un periode di tres aña, y studiantenan ta sigui seis curso den cada semester. Pa logra forma parti di e Dean’s List un studiante mester tin un GPA di minimo 3.25 den e prome aña y un GPA di 3.5 den e di dos y tres aña.
Segun decano John Wardlaw: “E ta un resultado cu ta exigi hopi dedicacion y determinacion, abilidadnan cu academiconan y professionalnan den communidad en general ta balora. E standard academico aki ta un refleho di cada studiante cu a traha pa ricibi e honor, y tambe e trabou di e staff completo. Nos ta sumamente orguyoso y ta felicita e grupo di studiantenan ehemplar aki formando parti di e prome Dean’s List.”
Dean’s List Fall 2016 ta consisti di:
Freshmen: Karel Arends (Magna Cum Laude), Zarianni Larmonie, Zoë Loefstok, Alfonso Rey Canal, Edward Schoop, Nathania Taylor, Jancis Tromp y Annabel Westerop.
Juniors: Thalía Jarzagaray, Danyela Vásquez (Magna Cum Laude) y Mary Joan Wardlaw
Seniors: Joe-Angelo Fingal y Jessica Valbuena (Magna Cum Laude)
Dean’s List Spring 2017 ta consisti di:
Freshmen: Karel Arends, Alfonso Rey Canal y Nathania Taylor
Juniors: Thalía Jarzagaray, Danyela Vásquez (Magna Cum Laude)
Agregando un otro momento historico pa e facultad e aña aki ta cu a yama bon bini na un cantidad record di 60 studiante den nan prome aña y 20 studiante internacional cu a scohe FHTMS pa nan hasi “exchange”. Mester remarca cu mayoria di e studiantenan internacional a ricibi y a basa nan desicion ariba recomendacion di otro studiantenan di nan Universidad cu anteriormente a yega di hasi intercambio cu nos facultad.
FHTMS ta reconoce e contribucion unico y strategico di e industria di turismo pa e desaroyo di Aruba y Caribe. E studiantenan ta wordo prepara ariba terenonan pa un carera profecional den diferente ramo. Pa mas informacion tocante e programa por bishita www.ua.aw of www.facebook.com/UA.FHTMS
