Diabierna mainta, Minister di Salud, Dangui Oduber a anuncia oficialmente e lansamento di FACT Team. Esaki ta un proyecto cu Gobierno di Aruba, hunto cu Sociaal Crisis Plan ta financia pa esaki.
A traha riba dje den e ultimo lunanan. Busca tur e profesionalnan cu tin mester di dje. A busca psikiatra, a busca psicologonan, a busca enfermeronan. E intension ta cu e FACT Team aki ta bay duna e servicio ambulatorio na mucha y hobennan cu tin problema di adiccion y tambe tin problemanan mental.
Minister Dangui Oduber ta lansa FACT-Team oficialmente
Posted by 24ora on Friday, September 20, 2019
FACT Team sigur ta un bunita proyecto segun e mandatario. Esaki ta demostra cu e gobierno aki ta duna atencion na e ser humano. A pone den nan programa di gobernacion, cu e hende ta central y sigur cu e FACT Team ta demostra esaki.
FACT Team lo ta disponibel 24 ora pa dia. Ta bay tin un number central cu ta bay ta atendi den oranan di trabao y tambe despues di oranan di trabao.
Ta bay tin un crisis opvang center, na momento cu famianan tin un persona cu tin problema cu adiccion, sea un mucha, un hoben of un persona cu problemanan mental, e por yama e number aki.
FACT Team ta sali e ora ey bay na e adres, haci un opname, wak kico ta e situacion, con urgente e situacion ta. Si ta un caso cu por atende ambulantoriamente, den e caso di e FACT Team, ta trat’e e ora ey.
Si ta un caso cu no por trat’e ambulante, ta verwijs’e na FMAA na Sero Colorado of na Respaldo, cu obviamente ta den bon cooperacion cu nan. Esaki ta un esfuerso conhunto cu a haci e ultimo lunanan aki, pa set up FACT Team.
Un sosten na esun mas vulnerabel
FACT Team ta algo nobo pa Aruba y nunca antes a haci’e. Ta pesey e ta asina importante pa haci e anuncio aki na comunidad di Aruba, pa asina comparti e noticia positivo. Gobierno ta bay duna esnan mas vulnerabel den nos comunidad, e atencion cu nan merece. Tin hopi hoben cu ta sufriendo di adiccion. Tin hopi hoben ta sufriendo di problemanan mental. E ta un problema creciente. E ta un problema di nos tur cu nos mester atende. Cu FACT Team, e lo bay duna e resultado desea. FACT Team tambe ta sosteni pa Mental Health Caribbean, cu a duna e consehonan necesario, hunto cu tur e profesionalnan cu tin.
E minister ta gradici cada un di e trahadonan di FACT Team cu durante e ultimo temponan aki, a bin ta prepara nan mes pa e momento aki y desde awo, e FACT Team ta operacional. Yamadanan por cuminsa drenta y e servicio ta wordo duna.
FACT Team ta ubica na Santa Cruz. Na Playa tambe FACT Team ta bay tey presente. Den futuro hopi cercano ta bezig pa un otro oficina na San Nicolas. E intension ta pa sigui expande den tur districto na Aruba pa ta mas cerca di e hende y brinda e ayudo cu nan tin mester.
Kico ta FACT Team
Rafael Lopez ta e guia principal di e FACT Team. FACT Team ta un sistema flexibel pa duna tratamento den comunidad. E persona no mester ta interna pa esaki. Ta un sistema cu ta implementa rond mundo pa limita cu un persona ta interna.
Pakico e FACT Team
SPD ta existi for di 1971, pero semper pa tratamento pa adulto. Loke nan kier awo, ta inclui mucha y hoben den e tratamento, loke no tabata tin disponibel ainda. Esey ta e diferencia di FACT Team awor aki di Departamento Social Psikiatrico.
Ta trata aki di hendenan cu problemanan mental, pero tambe ta pone enfasis riba drogadiccion y otro problemanan di comportacion. Pa mas informacion por yama 5856990 durante oranan di oficina y despues di oranan di oficina por yama 5224343.
Lopez a splica cu pa servicio por acudi na Avicenastraat of na Santa Cruz 132, tambe den oranan di oficina, cual ta di 7’or y mey di mainta pa 4’or y mey di atardi.
