Un area crucial di dr. Hospital Horacio Oduber a wordo afecta pa holor di diesel y e trahadonan no ta mucho contento. Ta trata di trahadonan di sala di operacion y radiologia.
Director di Hospital Horacio Oduber, Ezzard Cilie, a tuma nota di e situacion y a baha papia cu nan. E situacion ta leu.
El a splica cu como hospital mes, no tin nada di haber cu esaki. E tin hopi di haber cu construccion cu ta tumando luga awor aki. Esaki ta ripitiendo demasiado. Ta asina hopi biaha cu e ta sosode, kico Cilie por bisa e empleadonan pasobra nan no ta kere mas.
E director no por duna nan siguransa, e siguridad, caminda cu nan ta traha. Esey no ta posibel. Mientras tanto SOGA y e Mericanonan ta sigui nan caminda y Hospital ta carga e consecuencianan, Cilie ta keda hay’e cu e situacion aki.
Ora cu nan cera operatiekamer, e mester a cancela varios operacion, como tambe radiologia, e cita di e hendenan cu tin cu bay saca potret. E mester a carga tur esaki.
Aunke tin cu bisa cu e salanan no ta plat, pasobra den caso di emergencia tin un sala di operacion disponibel pa esaki. Pero e situacion ta keda fastioso. E no ta e ambiente saludabel pa pone e empleadonan traha. E hendenan ta haya molester di e lekkage cu tin. Un lekkage cu no ta caba di lek nunca parce. Esey ta loke e ta confronta cun’e.
E problema ta conoci
E director di hospital a splica cu e ta cauteloso den loke e ta bisa. E no ta su tereno di experticio, pero varios instancia cu a laga wak ta bisa dicon a construi e boilernan eynan. E no por duna un opinion riba algo cu e no sa. Esunnan cu a diseña e espacio di e boilernan no ta Cilie, pero nan a bin hay’e eynan. Esey ta e consecuencianan cu nan ta cargando. Si Cilie tabata tin algo di bisa y haci, e lo a kitanan for di eynan y pone nan otro caminda. Si bay papia di dje cu e ta costa placa, casi sigur ta spera cu hospital ta paga tambe, pasobra el a wordo poni na caminda robes.
Ezzard Cilie ta contento cu te awor aki cu TNO, cu ta renombra riba e tereno aki, lo bay yuda pa tira un bista y evalua con ta bayendo y kico ta wordo haci. Tambe, ta kere cu mester di supervision mucho mas estricto, unda cu SOGA ta tuma e liderasgo tambe pa locual ta pasa den bouw. Hospital mes kier yuda, pero nan no tin nada di bisa eyden.
Confiansa ta cabando
Mientras tanto tin cu deal cu e trahadonan. Poco poco e confiansa ta cabando. Nan ta kere ainda den leiding, pero nan kier mira accion. Cilie a splica cu esey ta loke nan ta bay pidi minister. Esun cu e ta kere cu por haci algo, ta e minister pero mester yude y sostene. Esey ta bay pidi pa wak con lihe por haci algo. No por sigui asina. Hospital no tey pa gana placa. Pero cada biaha cu cera, ta tonelada di placa cual e no ta haya y cu AZV su rason. E no por paga si hospital no duna servicio.
SOGA
Dos pa tres siman pasa tabata ultimo biaha cu tabata tin contacto cu SOGA. Cilie a splica cu nan no tin un contesta concreto y nan ta bezig cu e minister. E tin di haber cu e futuro, kico ta bay haci cun’e. Pero tambe pa un forma cu tin mucho mas supervision andando den cas. Na hospital nan tin hende di cuido y no tecnico ni arkitecto.
Un situacion di stof
E situacion no ta directamente dañino pa salud, pero e ta molestoso. Cilie ta kere ta un combinacion di ambos. Si un empleado bisa cu e tin molester di e holo cu ta skerpi, cada ken ta reacciona diferente. Tin di e empleadonan a haya alergia, sacamento, etc. for di e holo di diesel. Cada hende ta reacciona diferente. Ki mishi cu lekkage eynan. Eynan e problema ta cuminsa. No ta suppose di tin lekkage. Ta cosnan cu ta tuma luga. Hospital no tin arte ni parte den dje, sino djis denuncia kico ta pasa.
Entre e trahadonan
Cilie ta spera cu a logra convence e trahadonan. E experticio di e trabao tin cu wordo importa. Djis pa e motibo aki, mester sigura e trahadonan ta safe den e ambiente cu nan ta traha aden. Ta treciendo riba propio gasto, expertonan di Hulanda pa por check. E ta haci’e pasobra e ta responsabel pa salud di e empleadonan y e awor aki, e no ta cumpliendo.
