Exprodesk a organisa un curso pa hefenan di Aduana

343

Diamars ultimo Exprodesk a organisa un curso tecnico pa hefenan di departamento di Aduana riba e tema di “Exportacion pa Union Europeo”. Tambe presente tabata representantenan di Idea y Exprodesk cu ta forma parti di Departamento di Asuntonan Economico, Comercio y Industria.

Cu fondonan Europeo di COSME, Exprodesk a invita sr. James Lenaghan pa duna e
curso técnico aki. Sr. James Lenaghan tin hopi experiencia riba temanan di Aduana, Comercio Internacional y Reglanan di Origen pa drenta Union Europeo. E relacion di Aruba cu Union Europeo den forma di LGO ta brinda comerciantenan beneficionan ora cu kier exporta productonan pa Union Europeo. Un beneficio importante pa menciona ta e excepcion riba pago di invoerrechten ora productonan di Aruba drenta Union Europeo. Sinembargo e productonan mester cumpli cu cierto condicionnan pa por haya e excepcion aki. Departamento di Aduana ta hunga un rol primordial pa aplica e condicionnan di regla di origen pa evalua si un producto di Aruba ta cualifica pa haya e excepcion di pago riba invoerrechten di Union Europeo. E curso riba “Exportacion pa Union Europeo” a brinda un oportunidad pa amplia e conocimento cerca miembronan di Departamento di Aduana y Departamento di
Asuntonan Economico door di a repasa case-studies detaya, ehempelnan al caso y oportunidad pa discuti retonan cu ta encontra den practica.

Cu e curso aki e  departamentonan menciona ta mas capacita ainda pa asisti e exportador di Aruba y asina contribui na e desaroyo economico di Aruba. Exprodesk ta un ‘Export Promotion Desk’ cu a habri su portanan recientemente cu e obhetivo pa contribui na un desaroyo economico sostenibel atrabes di e capacitacion di nos empresarionan. Pa logra esaki, Exprodesk ta brinda sosten y guia na tur empresario cu lo kier exporta nan producto of servicio door di duna consulta, training y workshop. Exprodesk ta habri pa duna consulta na tur compañia y empresario cu tin interes pa exporta nan producto y servicio entre 8:00 am y 4:30 pm di dialuna pa diabierna segun cita. Nos ta situa den e edificio di Sun Plaza, riba segundo piso. Pa mas informacion bishita nos website www.exprodesk.com y sigui nos riba pagina di facebook Exprodesk pa keda al tanto di tur actividad, specialmente e training y workshopnan cu Exprodesk tin prepara pa 2018. Pa un cita of mas informacion por tuma contacto cu sra. Sharon Meijer via: [email protected]