Exposicion di Hot Wheels diadomingo na Sabana Liber

3596

Frido Farro tinun pasion cu e ta desea di comparti cu pueblo di Aruba. E ta ferviente coleccionista di autonan Hot Wheels.

E tin un coleccion basta grandi, cu el a cuminsa cu ne basta aña atras. Prome e tabata dedica su mes na careda di autonan chikito. Pues su yiu tabata sa di su gusto y asina un biaha su yiu a bini cu un volkswagen biña y a pone banda di television. Despues e mes a cumpra uno, y a pone banda di esun biña. “Asina nos a cuminsa colecciona. Ami ta trece un auto, y e ta trece un auto. Dado momento el a stop, pero ami a sigui,” Frido ta conta.

Exposicion di Hot Wheels diadomingo na Sabana Liber

Exposicion di Hot Wheels diadomingo na Sabana Liber

Posted by 24ora on Friday, June 5, 2020

E ta calcula cu den transcurso di añanan, el a logra colecciona casi 2200 autonan hot wheels. Su prome auto, el a haya na 2014. Y poco poco e cantidad di autonan a bin ta creciendo. Mirando e cantidad grandi di autonan, el a pensa cu muchanan sigur lo kier mira e coleccion pa cual el a dicidi di haci un expo di su autonan na su cas na Sabana Liber diadomingo awo. Frido ta kere cu esaki ta un pasatempo sano cu muchanan di awendia por dedica nan mes na algo asina.

Den un garashi, durante temporada di COVID-19, el a traha riba un proyecto di un cas di antaño, cu e ciudadanonan por admira tambe diadomingo awo ora cu e tene su exposicion. Esaki ta tuma luga na Sabana Liber 67-B (misa di Noord bin ariba) y despues bira na man drechi.