Den fin di siman a drenta e noticia tristo cu e conocido gerente general di e compania Fuels Marketing and Supply Aruba (FMSA), a fayece. Pa hopi hende e noticia aki a cay manera un baño di awa frieu, pasobra no tabata na altura mes cu Sergio Schwengle (60 aña) a hiba un lucha silencioso cu su salud. El a bay laga su señora y dos yiu atras.
Sergio Schwengle a traha hopi aña den mundo di refineria y specificamente cu benta di combustibel. Un tempo el a bay traha na Garage Cordia Aruba y despues di algun aña a opta pa refresa den mundo di benta di combustibel. E ta un di e poconan cu a traha cu e compania for di tempo di Exxon Petrolera, CAFCO, VMSA y despues cu FMSA, cu ta resorta bou di Refineria di Aruba (RdA).
De facto, Sergio Schwengle tabata maneha e compania cu ta pone “e webonan di oro” pa Refineria di Aruba, pasobra eynan so tabatin entrada grandi y sigura tur luna. E tabata maneha e compania cu ta importa gasolin, diesel, kerosin, Heavy Fuel Oil pa WEB y tambe Jet Fuel pa bende cu avionnan na Aeropuerto. Na momento cu RdA a cumpra VMSA, el a pasa over y asina a cambi e compania pa FMSA.
Sergio Schwengle tabata un gran amigo di nos compania, Headlines Group (24ora.com) pasobra nos a traha cu ne hopi aña, for di tempo di Garage Cordia y despues den e companianan di benta di combustibel. E tabata crucial den e traspaso di VMSA pa FMSA y nunca a sconde su orguyo cu porfin, despues di casi 100 aña, e refineria y benta di combustibel ta den man di pueblo. Pero, e tabata masha discreto cu su enfermedad y nunca a papia di dje, ni a laga ningun hende sa. E tabatin algun tempo caba na cas, pero no obstante cu el a gana varios bataya, den fin di siman el a perde e guera.
Na su famia ta bay nos palabranan di mas profundo condolencia. Na su casa y yiunan, Boso a perde un homber corecto, integro y bon conocedo di su trabou. Nos ta sigur cu e tabata un bon casa y un bon tata tambe. Hopi forsa. Cu nos amigo Sergio sosega na paz.
