Ex Minister Presidente di Hulanda, Wim Kok, di 80 aña di edad, a fayece. Ya pa un tempo e tabata sufri di un kebrante di slaud. Kok tabata Prome Minister for di 1994 te cu 2002 y a lidera e gabinetenan di PvdA, VVD y D66. Fuera di esey e tabata Presidente di sindicato, lider di oposicion y Minister di Finansas. Den tur e funcionnan aki, e tabata un persona cu tabata tin un responsabilidad enorme.
Pa nuebe aña Kok tabata presidente di FNV. Na aña 1982, el a cera e Acuerdo di Wassenaar cu e presidente di dunadonan di trabao Van Veen. E acuerdo aki riba loonmatiging y bahamento di oranan di trabao, a wordo mira como un contribucion importante den e reformacion di e economia di Hulanda, cu pa hopi aña tabata den un crisis profundo.
Cuater aña despues, Kok a sigui Joop van Uyl como lider di PvdA. Despues di algun aña den oposicion, el a haci PvdA un biaha mas e partido na mando. Como minister di finansas den e di tres gabinete Lubbers, e tabata responsabel pa e bezuiniging riba e WAO, loke a haci cu PvdA a bay den un crisis.
Na 1994, Kok a bira Prome Minister di e prome gabinete sin e Democratanan Cristian den tres cuarto di siglo. Den su añanan como Prome Minister, el a percura pa e economia Hulandes crece fuertemente y tambe a haci cu tin mas cupo di trabao.
Na 2002, e mes a dicidi pa caba cu su di dos gabinete, ora cu el a baha, debi cu el a tuma responsabilidad pa e drama na Srebrenica, cu a sosode shete aña prome. El a sali completamente for di politica y den e añanan cu a sigui, el a fungi como comisario di entre otro ING y Shell.
