Riba Dia di Mama, ex Prome Minister Mike Eman y su señora Doina Eman a bishita e ultimo luga di sosiego di mama Blanche, manera hopi ta recorde. Ex Prome Minister Eman a reflexiona riba Dia di Mama cu un atencion special pa esnan cu nan mama no tey mas.
“Pa nos famia e falta awe di nos mama ta un bashi cu nunca nos lo por yena mas. Doina y ami nos tur dos a perde nos mama y ta biba cu bunita recuerdo di e amor di nos mamanan. Mescos cu tur famia na Aruba nos ta tene na e calor di su amor cu ta perdura pa semper, na su recuerdonan cu ta graba den nos curason, na su balornan cu el a implanta den nos alma, na su ehempel di bida entrega na tur cu e por a juda, guia, consola y inspira. Un bida di convivencia cu su prohimo”, Mike Eman a expresa riba su pagina social.
Eman: nos mama a lanta nos cu fe den Creador, cu e balornan di honestidad, integridad y trabao duro, cu e virtud grandi di gratitud. Mi mama a biba su bida den gratitud. Esaki ta e amor y educacion di bida cu un mama ta asina yama dor di nos Creador pa pasa pa nan yiunan.Pesey ex Prome Minister Mike Eman a comparti su deseo tambe cu tur yiu cu nan mama ta cu nan ainda: “brase y tene duro, pasobra su stimacion y dedicacion na nos ta sobre humano. Na tur mama na Aruba danki pa ta mama di tanto amor y virtud”.
Feliz dia na tur mama.
