Ex docente, ex Miembro di Eilandsraad y ex Presidente di Parlamento di Aruba, Felix Flanegien a fayece awe diadomingo na edad di 74 aña. El a milita pa hopi aña como candidato di Partido MEP.
Felix Flanegien a nace dia 14 di September 1944 y ta yui di Felix Flanegin y Ceferina Ruiz- Flanegin.
Despues di a termina Radulphus College na Corsou y Colegio Arubano, el a obtene su “Hoofdakte” na Peter Kanis Kweekschool na Nijmegen. El a regresa Aruba y eherce su profesion di docente na St. Jozef School (Santa Cruz 1968-1970) y St. Tharcicius College (Oranjestad 1970-1972). Na aña 1972, siendo cabesante di Colegio Ora Ubao, Betico Croes a aserk’e pa e drenta arena politico.
Desde aña 1975 el a bira miembro di Eilandsraad y for di aña 1979-1985 el a eherce e funcion di Diputado di Enseñansa y Salubridad Publico. Tambe el a ocupa e funcion di Vice-Presidente di Parlamento Latinoamericano. Desde aña 1986 e tabata miembro di Parlamento y entre 1989 pa 1994 el a eherce e puesto di Presidente di Parlamento.
Banda di esaki, Felix Flanegien tabata hopi activo den trabao pa hubentud y a yuda funda Centro di Bario Noord (1967-1981). E tabata Vice Presidente di Federacion Antiano Hubentud (Corsou 1975-1981) y tambe Presidente di Mavo-Avond Leergangen Aruba entre aña 1979 pa 1981.
Felix Flanegien ta laga atras dos yui, dos nieta y un nieto. Hopi forsa na famia den e momentonan dificil aki.
