Ex Polis di Atlanta acusa di asesinato den tiramento di Rayshard Brooks

E ex Polis di Atlanta, ta acusa di asesinato, asina Paul Howard, Abogado di Districto Fulton county a bisa. El a tira riba un homber color scur na momento cu e tabata core bay cu e taser di polis siman pasa. A kita Garrett Rolfe for di trabou despues cu el a tira Rayshard Brooks di 27 aña, enfrentando 11 cargo criminal, incluyendo asesinato criminal.

Si Corte condena e ex polis di asesinato, Rolfe por enfrenta pena di morto of cadena perpetua sin libertad condicional. Howard a bisa cu fiscal a mira 8 video di e tiroteo y a papia cu 10 testigo, determinando cu Brooks no tabata un menasa di biaha di morto of lesionnan fisico p’e polisnan.

E fiscal di districto a bisa cu polisnan a faya di duna Brooks e atencion medico pa 2 minuut despues cu a tir’e. Tambe Rolfe a scop Brooks ora e tabata riba vloer, “bringando pa su bida.” E di dos polis presente, Devin Brosnan, tambe tin 3 cargo contra dje, inclui maltrato pa para of trapa e schouder di Brooks despues cu a tire, asina Howard a bisa.

Brosnan a bay di acuerdo pa coopera como testigo p’e estado y testifica contra Rolfe. Pero fiscalnan ta recomenda un bond di $50.000 a cambio di su cooperacion. Brosnan ta un di e prome polisnan den Fulton County pa testifica contra un hende den su mesun departamento. Dia 12 juni Rolfe y Brosnan a yega drive-thru di Wendy’s pasobra Brooks a pega soño den su auto. Brooks no a pasa e test di sobriedad y a bringa cu polis ora nan a purba di pone handcuffs. Brooks a bringa pa kita e Taser di un polis, a core bay y a apunta e Taser riba un polis prome cu Rolfe a tir’e. El a muri durante e operacion. Segun e autopsia, Brooks a sufri 2 herida di bala na su lomba y den e rapport a pone homicidio.

Abogadonan di Rolfe a bisa cu e ex polis “tabata teme pa su siguridad” y pa esnan rond di dje. “Brooks a ataca violentamente 2 polis y a desarma un di nan. Brooks a bira y apunta un obheto riba Rolfe, cualkier polis lo a kere cu e tabata purba desarma, kita of herid’e seriamente,” e abogadonan a bisa. Fiscal di e distrito a bia cu e abogadonan ta determina cu e Taser di polis a wordo uza 2 biaha caba y no tabata forma un menasa.