Ex Polis declara liber di estafa

5902

Diabierna mainta Rudolfo Gibbs, ex Polis, a hala un rosea profundo despues cu Hues a lesa e veredicto den su caso. A declar’e liber di e acusacion y ta entrega materialnan confisca na dje.

Tabata den transcurso di e aña’ki cu seis persona a entrega keho contra e persona aki di a estafa nan pa un suma di mas cu 9 mil florin. E ta relaciona cu carta of peticionnan di asilo cu Gibbs mester a haci pa nan. Despues cu nan a mira cu nada ta tumando luga, a dicidi di entrega un keho pa cual a detene Gibbs dado momento.

Den e caso presenta dia 25 di october ultimo Fiscal a acus’e cu den e periodo di prome di september, 2018 te cu 28 di maart, 2019, pasando como Abogado a pone e denunciantenan entregue placa, nan documentonan oficial of copia; a traha carta cu informacionnan no corecto; a pasa su mes como Abogado siendo cu e no ta; a bisa nan of duna nan e impresion cu a cuminsa cu e procedura di asilo; cu e peticion aki ta mescos cu un permiso di estadia; a duna un charla cu informacionnan incorecto di e procedura di asilo; a mal informa nan bisando cu mientras ta atende cu e peticion, nan por traha. Tur esaki a pone cu e hendenan a dun’e placa y documentonan necesario.

Despues di studia e caso, Corte a yega na e conclusion cu e acusacionnan no a keda legal y convincentemente proba.

Tin e aspecto tecnico cu a hunga un rol. Esta cu na momento cu a traha e acusacion, ainda tabata valido leynan internacional como tambe e ley di admision bieu. Y e leynan aki no tin reglanan procedual pa peticionnan di asilo. Corte ta bisa cu e forma con e acusado, den nomber di e denunciantenan, a expresa cu nan kier haci peticion di asilo, no ta en pugna cu e regulacionnan di e tempo ey.

Pa loke ta e otro aspectonan, Hues ta bisa cu for di e declaracionnan di denunciantenan no por deduci cu Gibbs a haci comosifuera e ta Abogado den su combersacion cu nan. Y si analisa e cartanan standard y facturanan cu el a skirbi, ta mustra cu e tabata haci trabou di consehero huridico, cu no ta un profesion protegi.

Pa loke ta e cartanan standard cu el a traha cu tabata contene informacion no corecto y cu el a crea e impresion cu di e forma aki a inicia e procedura pa peticion di asilo, Corte ta considera lo siguiente. DIMAS den su denuncia a bisa cu Gibbs a entrega cartanan standard den cual e datonan di contacto di esnan cu ta haci peticion falta pa cual no por a cuminsa cu e procedura. Pero Gibbs a bisa cu el a traha e peticionnan den cual e datonan di e personanan ta inclui (nomber, adres, number di telefon y number di paspoort) y cu su splicacion.  DIMAS a tuma e peticionnan aki y a pone un stempel cu fecha riba cual a ricibi esakinan. Y basa riba e peticionnan aki entrega, DIMAS a yama e hendenan, incluyendo e denunciantenan, pa un audiencia y di e forma aki a inicia e procedura di asilo. Fiscal di su banda no a bisa si nan a wordo yama un otro biaha mas of no.

Hues ta tene na cuenta cu e carta di peticion traha door di Gibbs y entrega na DIMAS ta contene tur e datonan necesario. Di e forma aki no por bisa cu ta trata di cartanan standard den cual falta datonan di contacto di e personanan. A base di esaki y e hecho cu DIMAS a invita e hendenan pa un combersacion, mester conclui cu di berdad a inicia cu e procedura di asilo. Cu el a bisa nan cu di e forma aki nan por traha, no por deduci for di ningun di e declaracionnan di e denunciantenan. Net lo contrario, pasobra for di e diferente denuncianan ta resulta cu a bisa cu nan no por traha.

No tin prueba legal ni convincente tampoco cu e lo a bisa e denunciantenan cu e peticion entrega por wordo mira como un peticion di estadia, of cu el a duna nan informacion incorecto den un charla duna na e grupo.

Basa riba tur e puntonan aki a declar’e liber di e acusacion. Tur material confisca ta entrega bek na Gibbs, cu excepcion di e maleta di marca Ricardo.