Benny Sevinger tabata hopi trankil diaranson mainta den corte, aunke cu esaki tabata e prome biaha cu e ta sinta eyden como acusado. E prome dossier trata tabata esun di Fundacion Curason Berde (FCB). Na opinion di Ministerio Publico, via e fundacion aki el a comete falsificacion, estafa, tuma regalo of promesa, labamento di placa y abusa di su funcion.
Ministerio Publico ta kere cu comerciantenan manera Curt Harms y Pieter Susebeek, a hinca peticionnan bou nanishi di e mandatario y el a firma nan. A cambio, e comerciantenan (amigo) tabata contribui cu donacion na e fundacion FCB pa e campaña di e acusado aki. “Mi no a privilegia mi amigonan.”
El a splica cu e no a mira nomber di e acusadonan ariba menciona y tin di nan ta nomber di compania y e no sa cua compania ta di ken. Ademas, el a menciona e parti cu e terenonan unda cu p.e. Harms a haya, ta hole masha stinki mes. No ta privilegia un hende dunando un tereno unda dificilmente por construi algo cu lo ta popular.
