Ex Minister Presidente di Aruba cerca Gobernador di Corsou

Awe merdia ex Prome Minister di Aruba, mr. Mike Eman a realisa un bishita di cortesia na Gobernador di Corsou, Lucille George-Wout. E lider di partido AVP tabata compaña pa miembro di Parlamento, Robert Candelaria.

Den e siguiente dianan aki, Aruba y partido AVP ta bay asumi algun responsabilidad hopi grandi den un organisacion cu yama ODCA, organisacion Democrata Cristian di America, cu ta un famia grandi di e partidonan Cristian Democrata den henter region. Sur America, Centro America y Caribe. Den e funcion nobo cu nan ta bay haya ta bay duna oportunidad pa sirbi nos pueblo y islanan. Ta mira cu ta importante cu den e funcion aki tambe, por recoge sentimentonan cu ta biba cerca e otro islanan, pa ora cu asumi e responsabilidad aki, cu por no unicamente trece locual ta prioridad di Aruba, locual ta deseo di Aruba, pa por atende den e plataforma grandi aki, den cual ta bay haya un funcion importante, pero tambe por vocifera e opinion y pensamento y deseonan tambe di e otro islanan.

Ex-Minister President bishita na Gobernador di Corsou

Ex-Minister President bishita na Gobernador di Corsou. Click link pa mas https://24ora.tv/2QsegkV

Posted by 24ora on Monday, May 27, 2019

Esey ta loke ta haci cu hopi placer cu e sentido di hermandad cu tin cu e islanan, pero tambe un sentido di responsabilidad cu politica na e momentonan aki mester orienta su mes riba e rol y e funcion cu e tin, caminda cu ta mira den hopi pais. Ta hopi gradicido cu AVP ta e partido mas grandi di Aruba ainda, pero ta mira cu den hopi pais partidonan politico toch ta biba cu reto pa mantene e confiansa di e ciudadania den e sistema di gobernacion cu nos tin.

Hopi biaha e sistema di gobernacion a bin ta aplica, sea neoliberal of e sistema social democrata, caminda cu estado ta hunga un rol importante. Cada dos di e metodonan ey a perde toch algun di su aspectonan atractivo y por mira por ehempel na Merca, e desaroyo di populista, cu un Presidente Trump cu a wordo eligi riba un plataforma totalmente distinto, tin di haber cu e politica, no ta ofreciendo e comunidad, e direccion e vision, e sentimento cu convivi cu pueblo manera cu mester ta.

Ey tin un tarea grandi pa e lidernan politico pa orienta nan mes riba un narativo nobo, con pa duna e pueblo un biaha mas tur rond den mundo, e confiansa cu cosnan cu ta haci nan dolor, e desigualdad den e reparticion di bienes.

Bo ta mira den varios pais hopi pobresa, aunke cu e pais tin economia grandi. Pero no tur hende ta comparti den dje. Tur esaki ta defectonan cu tin den e modelonan politico economico cu nos paisnan tin y cu hunto lo kier drecha. Ey ta importante pa haya opinion di tur hende pa ora cu presenta e visionnan nobo, cu ta duna nos comunidadnan e confiansa cu tey pa sirbi nan, cu ta algo sumamente importante.

 

Otro bishitanan

Segun Eman, tambe e lo bishita e exprome ministernan. Tin reunion cu ex prome minister Ijs, ex prome minister Emily de Jongh-Elhage, cu ex prome minister Maria Liberia Peters.

Ta kere ta importante pa papia naturalmente cu gobernantenan actual, pero tambe pa papia cu esnan cu a yega di sirbi nos paisnan cu tin un miras riba historia, kico ta e cosnan cu a funciona y kico ta e cosnan cu no a funciona, pa hunto por mehora e modelo politico cu ta ofrece nos comunidad. A asumi un posicion importante di responsabilidad den duna un aporte na esaki.

Como ex prome minister di Aruba, Eman tin un bista bek riba cosnan cu a mira cu bo por a logra a base di e modelo politico cu a hiba na Aruba di inverti den e pueblo, den calidad di bida, den mehora tambe e reparticion di e bienestar y ta kere cu e enfoke ey di sentimento humano y convivencia, duna atencion na nos comundidad y nos barionan ta esencial pa e rumbo nobo di e narativonan politico cu mester keda duna pueblo confiansa den e futuro di nos paisnan. Pero tambe den nos modelonan politico cu sigur cada biaha ta mira den mundo, cu nan ta wordo siguramente cuestiona door di ciudadania.

Por mira na Francia un parti importancia di ciudadania ta riba caya tur diasabra. Pasobra tin un inkietud. Tin un sentimento cu e modelonan politico no semper ainda ta responde na e necesidad di e pueblo. Ta na e lidernan politico pa haci e cambionan na tempo y pa ofrece nos comunidad cada biaha den un etapa nobo un oportunidad tambe pa un otro etapa di progreso.

Contacto cu prome minister di Aruba

Segun Eman, esaki ta parti di e trabao cu AVP tin pa haci. Den nan arena politico na Corsou, na Aruba, den henter mundo por mira cu tin un politica cu ta hopi basa riba polarisacion, caminda cu e dialogo entre e oponentenan politico no ta locual e mester ta. Ey tin sigur espacio pa por drecha. Na Aruba, mescos cu Corsou, e tipo di dialogonan ey entre partidonan di oposicion, lidernan di oposicion, lidernan di gobierno tin biaha ta cana cu dificultad, pero sin duda e pensamento cu ta bay adopta tambe pa locual ta trata nan responsabilidad como un di e dirigentenan importante di e organisacion Social Cristian na America, lo ta los di e sentimento unicamente di bo color politico, pero di bo responsabilidad di bo pais, pa bo region, pa otro pais, pa otro nacion y otro pueblonan. Den e sentido ey mester tin hopi mas espacio pa cooperacion y tambe di alogo entre esnan cu no tin e mesun bandera politico.

Michiel Godfried “Mike” Eman ta naci na Aruba dia 1 di september 1961 y ta e di 3 Minister Presidente di pais Aruba. El a studia ley na Universidad di Antias y despues di bira Hurista, el a sigui studia pa Notario.

El a inicia su carera politico na aña 2001 y a logra 3933 voto. Na aña 2003 el abira Lider di Partido AVP. Den eleccion na aña 2005 el a sigui crece y tabata bon pa 6188 voto. Den eleccion na aña 2009 el a haya 8068 voto riba su nomber y a bira Minister Presidente di nos pais. De eleccion na 2013, siendo e prome mandatario, el a crece atrobe, aunke tiki, y a haya 8222 voto individual.

Den e ultimo eleccion na 2017, Mike Eman a conoce su prome caida den voto y a logra 7822 voto riba su nomber. Mester menciona cu desde eleccion di aña 2005 te cu 2017, Mike Eman ta e “votegetter” di Aruba, pues e politico cu mas voto riba su nomber.