Jacintha Constancia no ta un nomber desconoci, no pasobra el a move hopi tempo den arena  politico, sino pasobra como Mandatario y Parlamentario el a percura pa hopi consternacion, sospecha di ta envolvi den un escandalo di “mondkapjes” y e cantiman y supuesto menasa cu el a lansa contra un colega den Parlamento.

E siman aki ta aparece riba rol di Corte di Prome Instancia di Corsou e nomber di Jacinta Constancia, miembro di e partido político MFK, y ultimo aki tabata miembro di Parlamento.

Constancia tabata Minister di Salubridad Publico ora cu a surgi e famoso caso Dubnium, cual a tuma luga entre 2010 y 2012, ora cu e tabata Minister, unda cu a paga 365 mil florin pa cumpra masknan. E mercancianan aki nunca a wordo entrega.

Durante e investigacion dado momento e ex mandatario Constancia a presenta na Warda di Polis pa interogacion y a detene pa fraude, malversacion, labamento di placa y tambe falsificacion di documento. Den e caso aki a detene diferente sospechoso y Abogado Pepie Sulvaran a trata pa e caso contra su cliente no bini dilanti, mirando cu practicamente, na nan opinion, no tin nada pa persigui su cliente. Sinembargo Corte no a bay di acuerdo y a pone e caso aki riba rol pa diabierna awo. Den e caso aki el a keda un siman den detencion preventivo.

Jacinta Constancia despues di e caso Dubnium a haya su mes envolvi den otro caso, cual ta e menasa y maltrato cu el a comete contra un colega di Parlamento den luna di maart 2017. E caso a wordo trata den luna di juni 2017, unda cu Corte a dicidi cu den e caso di menasa Ministerio Publico a wordo declara no admisibel, ya cu e ta cay bou di e instrumento di inmunidad den sala di Parlamento. Esaki tabata e menasa haci contra Elsa Rozendal.

Esaki tabata otro den e caso di maltrato di e miembro di Parlamento Giselle McWilliam, cual si a keda proba. Pa esaki Corte a haya cu el a actua deliberadamente pa cual el a wordo condena na 80 ora di trabou pa comunidad of 40 dia cera.

Comments

comments