Ex-lider deportivo den Corte acusa di pedofiel

Mañan diabierna mainta ta poni riba rol e caso penal contra un ex-lider deportivo, Franklin Priest, un persona hopi conoci den e bario di Dakota pero tambe na Aruba en general. A detene Priest na luna di juli 2021 y esaki a cay manera un baño di awa friu. Mas ainda ora cu a scucha e sospechonan cu tabatin contra dje. Ta sospech’e di a mantene relacion sexual, segun a bisa e tempo ey, cu un mucha homber menor di edad.

Franklin Priest na momento di su detencion tabatin 36 aña y tabata traha na Bureau Leerplicht. Un posicion pues di control cu hobennan menor di edad ta asisti debidamente na scol, manera ley ta prescribi. Pero tambe e tabata entrenado di varios ekipo di futbol y e ultimo club na cual e tabata afilia tabata Brazil Juniors.

E tempo ey a wordo bisa cu den pasado caba el a yega di hay’e den tipo di problemanan asina pa cual algun team a finalisa nan relacion cu ne.

Lo trata su caso mañan diabierna pa 11:00 am y e lo wordo asisti legalmente pa abogado mr. Demis Illes. Aña pasa Corte a trata un cantidad grandi di e casonan aki, esta di pedofilia. Lamentablemente ta un biaha pa aña so ta logra haya e cifranan aki. Esta ora di entrega di relato anual di casonan trata den Corte. Cifranan oficial di cuanto persona a haya condena ta dificil pa haya acceso na nan.