E palabra drive-by shooting ta un palabra cu e muchanan di awendia a tuma over for di Youtube of e otro plataformanan social y adapta esaki den nos vocabulario, ta locual Carlos Hodge a comparti cu nos na comienso di su entrevista. Esaki ta e prome descripcion for di un di e expertonan cu nos a acerca riba e fenomeno alarmante cu ta biba na e momento aki den comunidad.
Pa yega na un comprendemento den e mundo criminal, a acerca un persona cu un amplio experencia y cu un trayectoria excepcional di 37 aña den Cuerpo Policial. Carlos Hodge ta e persona corecto pa duna nos un miho bista di kico y con pa interpreta e fenomeno di drive by shooting.
Ken ta Carlos Hodge?
Carlos Hodge a bira polis na aña 1979. A nace y cria den Village den bario di San Nicolas, Durante e casi cuater decada di trabou, el a traha den diferente departamento, entre otro departamento di trafico, departamento uniforma y recherche. Den su tempo e tabata un di e caranan mas conoci di e departamento, cu e tampo aya tabata hibe e nomber di Sectie Verdovende Midellen, conoci como SVM.
Den e cuadro ey el a investiga algun di e casonan di mas grandi den historia penal di nos isla. Manera entre otro caso di asesinato cruel, droga y sin lubida caso internacional manera detencion di Alvaro Triana. Su ultimo rango tabata inspector primera clase y su ultimo funcion tabata di hefe di departamento di recherche di Oranjestad. Despues di su salida, pa puro casualidad, su mes un ruman homber chikito a tuma e funcion over di dje.
Hodge a comparti cu nos cu ta hopi caso a impacta su carera pero semper tin algun cu ta impreciona mas cu e otro. Entre nan, un caso caminda cu un hoben a presenta y yega point blank tira of miho bisa, asesina un otro persona. Durante investigacion por a mira e imagennan capta via camara con e hoben aki a comete e acto aki. Algo cu te dia di awe e ta corda claramente.
Den su trayectoria a mira un diferencia di antes y awo. E uzo di arma y of tiramento aki tabata uno mas directo (gericht) riba e contrincante compara cu awe cu ta pasa tira pa keda den anonimato breve. Hodge a menciona tambe entre otro e edad promedio, cu ta entre 15 te cu hoben adulto, aunke a presenta caso caminda cu e edad a yega di baha te na 12 aña, cu ta preocupante. Den su bista, e parti social ta hunga un rol esencial pa asina brinda un miho guia, pa e ta uno exitoso. Pa logra e exito aki mester enfatisa riba e follow up.
Una bes e bala ey sali, ta bay e ta bay
Una bes e bala ey sali bo no por yam’e bek. Pa evita, resolve of identifica e problematica tabatin un miho comunicacion cu e comunidad. Pa sirbi bo comunidad bo mester tin concacto social cu ne, cu segun Hodge ta faltando na e momento aki. Tin un dependencia na tecnologia enbes di contacto directo, pero mas importante confiansa mutua cu e pueblo, pa ricibi informacion cu por ta di vital importancia.
Carlos Hodge a enfatisa: “Sigur, mi tabata un persona hopi streng, ta bisa e cos manera e ta y ta keda y mantene locual cu ley ta bisa”, pero e respet semper tabata presente pa asina scucha e hende y su problema. Ta algo cu yuda masha hopi den su carera pa yega na informacion necesario.
Ningun hende kier ta un snitch
Relaciona cu e fenomeno aki, a bin dilanti e palabra snitch, cu ta frecuentemente uza y ta perhudica hopi biaha diferente caso. Gran mayoria di drive by tin un historial su tras cu fasimente lo por a yega na aclaracion, prevencion y of solucion. No obstante casi nunca ta e caso pasobra ta presiona e hoben pa tene su mes na un code cu no ta aplicabel pasobra no ta existi e fraternidad di gang aki na Aruba. Si e informacion cu un persona tin ta crucial, e tin cu presenta esaki enbes di tuma e postura di snitch cu no ta aplica na dje.
Hodge a duna un splicacion kico realmente ta un snitch. Esaki tin di haber mayoria biaha na organisacion criminal grandi manera entre otro na Merca, caminda un gang y esunnan cu ta pertenece na esaki, ta tene nan mes na un codigo di conducta y lealtad. Si un persona kibra e codigo aki y bay snitch informacion confidencial/ secreto perteneciente na e organisacion, anto na e momento ey ta considere un snitch.
Aki na Aruba no tin dicho organisacion criminal di tal indole. Un persona den comunidad bay divulga cierto informacion valiso no tin nada di haber cu gang. Hodge di su banda ta prefera di no label un grupo di hoben cu e nomber di gang.
Polis mester ta semper den contacto cu comunidad
Locual cu Carlos Hodge a conta ta, cu tempo di su tempo polis tabata mas den contacto cu e pueblo. Como sirbido di e comunidad bo mester ta den contacto social estrecho y direcho cu ne. Den su bista e ta sinti cu esaki ta haci falta den Cuerpo Policial awendia. No ta pasobra bo a cera un persona esey ta hacie automaticamente bo enemigo, esey no ta asina. E ta un problema pa e sociedad pero e no ta algo personal y den hopi caso ceramento no ta e solucion. E persona aki mester di ayudo pa asina e por realisa cu locual e ta haciendo no ta corecto.
Comunidad ta bo wowonan
E importancia di ta den contacto cu bo comunidad, ta cu nan ta bira bo wowo eyfo. Nos tin diferente grupo di mucha cu a perde e bon caminda. Den su tempo tambe tabatin e bon amigonan den bario, cu tabata cana hunto y haci maldad, incluyendo e mes. El a lanta den Village caminda si bo a bringa cu un, bo tin cu bringa cu tur. Pero nunca a considera su mes parti di un gang, al contrario ora e yega cas y su mama haya tende di kico a pasa, tabata bisa mes ora ken tabata cu ne, kico a pasa, ken a haci y mas.
Pa duna nos hobennan e nomber of e label ey, ta net locual cu nan ta busca pa engrandece nan ego of reputacion cu nan kier haya. Pesey nunca caregorisanan di tal forma. Algo cu si ta punto di atencion y cual ta haci apelacion pa dun’e su debido atencion, ta e edad di e hoben envolvi den un of otro crimen riba nos isla. Ta algo cu tin cu bay atende cu ne lo mas pronto posibel pasobra esaki ta bahando cada biah mas y mas y e ta preocupante.
Den su tempo como recherche e edad tabata entre 18,19 of 20 mientras awo akinan el a baha den algun caso te na 13 aña cu ta un señal serio cu mester haci algo pero sin ayudo di e mayornan e ta hibando awa pa lama.
Ta momento cu cuminsa nota e fenomenonan aki, mester bati na e bel. Kico ta locual mester pa baha e cantidad, preveni pa esakinan tuma luga. No solamente soluciona un tras di otro cada caso ta importante pero tin cu gara e problema na e raiz, no tap’e pasobra ora e cuminsa crece bek e ta bin mas fuerte. Aplica schoolplicht mirando cu ta trata di mucha bou di cierto edad cu mester ta na scol y tin e debido control riba esaki.
Carlos Hodge na final a remarca cu mas blauw riba caya no necesariamente kiermen cu e ta mas efectivo. Antes tabatin menos polis trahando pero nan tabata traha mas eficiente. Menos polis, mas eficiente y tabata soluciona e casonan. Bisando esaki, e no ta conseha pa busca mas polis riba caya sino pa cambia e forma di traha y busca e formula mas eficiente y dirigi riba prevencion di crimen. Tambe, pa polis ta mas cerca di pueblo, cu lo yuda enormemente den por compila mas informacion di caya pa soluciona mas caso den forma rapido.
