Ex docente dilanti Hues pa estafa di miles di florin

Arnold Kenneth Maduro, un ex docente, a haya su mes envolvi den un caso serio cu husticia. Asina serio cu a haci denuncianan contra dje y diabierna e tabata dilanti mesa berde. E acusacion contra dje ta di estafa den periodo di 13 di mei 2018 pa 24 di juni 2018. Ta acus’e tambe di estafa, falsificacion y desfalco den e periodo di october 2017 te 3 di januari 2018.

E tabata cera caba ora cu el a pasa pa ta Director of lo bira director di un scol na San Nicolas y cu e tabata en busca di personal pa e diferente cuponan habri pa docente y personal administrativo na tres scol pariba. El a tuma placa for di e hendenan aki pa e diferente formularionan cu nan mester busca pa solicita pero tambe pa pasa entre otro test psicologico. Pero ora cu nan ta mira cu no tin fin pa e proceso cana, despues di e combersacion di solicitud, a cuminsa sospecha cu algo ta robes y a haci denuncia.

El a wordo deteni na januari 2018 pa investigacion pero na maart el a sali liber, sperando tratamento di su caso. Ora cu a kere cu el a siña su les, ate atrobe den problema cu husticia. El a purba bende un tereno na dos señora, pero dicho tereno no ta pertenece na su famia mas desde aña 1995 caba. Un di e señoranan a dun’e un adelanto di 2500 florin y e otro 10 mil florin. Ambos tabata den Corte diabierna pidiendo pa haya nan placa bek.

Ora cu un di e victimanan aki a sinti cu tin algo straño pasando, el a cita e homber na e tereno y a yama Polis. Na momento cu Polis a yega, como cu nan tabata bisti na civil, el a spanta y a huy for di e sitio. A sigui un persecucion sin fin, den cual a participa diferente auto di Polis y hasta a cera caminda tres biaha pa logra par’e pero nada. Finalmente el a pega den un mondi y ey ta caminda el a wordo atrapa.

E homber aki no solamente a horta e dos señoranan y esunnan cu tabata interesa pa traha na e scol, pero tambe a tuma placa di un señora bieu pa su tata (di e acusado) drecha esaki y nunca e dak a wordo drecha. El a tuma placa di e yiu specia di e señora, kende el a duna les di stuur y kier a bende su auto. Pero e homber special nunca a haya e auto.

El a bisa Hues “Mi a siña mi les. Mi sa cu mi tabata fout”. El a priminti shelo y tera cu ora e sali e lo traha pa paga tur cos bek. El a trata un biaha caba pero un hende a yama su trabou bisa cu e ta ladron y nan a kite.

Awo fiscal a dicidi cu e no por dun’e un chens y a pidi pa castigue di 29 luna di prizon, di cual 7 ta condicional y 2 aña di prueba. Pa e dos señoranan Fiscal a pidi “schade vergoeding maatregel”. Esaki ta nifica cu si e no paga nan, Gobierno mester paga nan e suma pa cual nan a wordo perhudica.

Hues lo dicta sentencia dia 16 di november awo.