Ida Lamp a traha como 20 aña como Director di EPB Hato, cu ta conta cu 1600 alumno y mas o menos 160 docente. E scol ta haya subsidio anualmente di Stichting EPB cu ta haya su entrada for di Gobierno di Aruba. Ta acusa Lamp di a malversa Afl. 369.738,01 entre 1 di januari 2016 pa 31 di october 2017. Ora el a sinti cu nan a gar’e, el a core baha cu pensioen pero esey no a stroba e fundacion di persigui’e penalmente y civilmente.
Ex docentenan ta lamenta cu a opta pa investiga pa solamente dos aña siendo cu e persona tabata den funcion pa como dos decada. Ta sospecha cu e lo a malversa riba 1 miyon florin, pero no a logra demostra esaki den e investigacion di solamente 2 aña.
Sinembargo, directiva di SEPB ta haya cu e director di e Fundacion tambe a faya den controla e Director di EPB Hato. Como tal, a pidi su retiro inmediato for di trabou, locual Hues a aproba tambe. Monique van Helfort como tal a perde su trabou na december 2018, pa motibo di no a controla Ida Lamp suficiente y a permiti cu pa añanan largo e por a malversa tanto placa asina di e scol, sin cu ningun di e sistemanan di siguridad y control a funciona.
Directiva di Fundacion Educacion Basico Profesional (SEPB) den fin di siman a emiti un comunicado relaciona cu e proceso civil y penal cu ta canando den forma simultaneo contra e sospechoso. Na october 2017 a tuma nota di un posibel fraude door di e ex Director di EPB Oranjestad cu a caba di baha cu pensioen. Un investigacion preliminar a yega na pruebanan di facturanan falsifica, checknan dudoso y un gran cantidad di datonan digital. Directiva a contrata un compania di servicio ‘forensico’/investigacion criminal profesional riba tereno di accounting.
Locual a resalta ta e forma sofistica cu e fraude a sosode door di entre otro haci mal uzo di confiansa di entre otro personal di e organisacion. E compania contrata a haya suficiente prueba pa Directiva por a entama un caso civil y entrega keho penal contra e ex Director di EPB Oranjestad. Na luna di juni 2018 Directiva a informa personal di e organisacion di e fraude den liñanan grandi, pa no stroba e investigacion andando.
Basa riba e experiencia y conocimento adicional cu e caso di fraude aki a duna, Directiva a cuminsa e trayecto pa mehora y fortifica diferente proceso administrativo y financiero cu ayudo di expertonan den e ramo. Consecuentemente otro trahado (administrativo y di maneho) a haya medidanan disciplinario di Directiva aunke nan no a beneficia personalmente di e fraude y cu nan a actua di buena fe/confiansa den e Director.
Otro consecuencia di e caso di fraude ta cu Directiva di SEPB a bay Corte pa termina relacion di trabou cu e Director general di SEPB. Esaki considerando cu su persona a nenga structuralmente di atende cu Directiva riba su responsabilidadnan y posibel fayonan relaciona cu e fraude. Na december 2018 Hues a dicta sentencia na fabor di Directiva di SEPB.
Tambe a haci denuncia penal na luna di juni 2018 na Landsrecherche simultaneamente cu esun entrega door di e Minister encarga cu Enseñansa, despues cu e rapport forensico a sali definitivamente. E denuncianan aki ainda ta den tratamento. Directiva ta mantene contacto estrecho cu oficina di Minister di Enseñansa referente e pasonan cu a tuma y ainda falta pa tuma pa fortifica e organisacion mas ainda.
Directiva ta lamenta e fraude constata y tin tur comprencion pa e frustracion di trahadonan di SEPB y di comunidad cu a malversa fondonan publico di enseñansa profesional.
Loading…
Reload document 
Open in new tab 
