Ex coleganan policial a expresa nan apoyo na candidato di AVP Robert Candelaria

Dos ex funcionario policial tabata presente na cas di partido diahuebs mainta pa anuncia Robert Candelaria como candidato di AVP den e proximo eleccion parlamentario di dia 22 di september awor. Papito Comenencia, ex vocero policial a bisa lo siguiente: “Awe ta un dia hopi grandi unda cu un persona cu mi a traha cune, un persona cu stima Dios kende ta nada menos cu Robert Candelaria, ta drenta politica. E ta un persona integro cu mi a traha cune den Cuerpo Policial y cu sa hopi di aspectonan hudicial. Un persona cu despues a sigui specialisa su mes den e area di siguridad. E ta un persona cu ta caracterisa su mes pa e hecho cu e ta investiga algo prome cu e dicidi kico e ta bay haci. Pesey mi ta sigur cu AVP tin den dje un persona cu hopi conocemento den siguridad y criminalidad cu ta bay engrandece e pueblo, y partido AVP.”

Despues di Papito Comenencia a hiba palabra otro ex funcionario policial, kende tambe ta apoya Candelaria, esta Ricardo Muller. “Mi a bin awe pa splica e sistema con nos tabata traha cu sr. Candelaria. Mi a conoce sr. Candelaria for di aña 2001 trahando na Warda di Polis na Playa. En realidad el a yega na aña 2000 y a bay traha na Warda di Polis San Nicolas y 2001 el a yega Playa. Ken ta sr. Candelaria? Sr. Candelaria tabata ploegcommandant na Playa. E ta un persona cu ta gusta combersa cu tur hende, e gusta nan contribucion (input). E no tabata un hende cu ta djis yega bisa kico e kier of kico e no kier. E ta scucha tur hende y ta papia cu nan. E ta purba tur momento pa resolve tur problema. Loke mi ta haya bon di sr. Candelaria ta cu e ta un persona hopi integro. Otro cos mi a nota ta cu ora cu sr. Candelaria a bay recherche, tempo cu mi tabata den directive di sindicato di Polis, ta cu nan tabata papia hopi bon di dje. E tabata un hefe cu ta duna e funcionarionan e chens di dicidi kico bo kier haci, y si e mester tuma un decision na final, e lo tume.”

Den e ultimo parti di su discurso el a bisa: “Otro punto cu mi mester trece dilanti ta cu hopi biaha, ora cu Inspectornan yega for di Hulanda, nos como sindicato ta bisa laga nan traha den tur departamento. Den caso di Candelaria el a traha den tur departamento. Pues e conoce Cuerpo Policial den su totalidad, el a traha recherche, straatdienst y ultimo el a bira hefe y miembro di staff di Cuerpo Policial. Pa loke ta husticia, Candelaria ta un bon persona cu sa hopi loke ta encera e trabou di polis. Mi kier yama Candelaria bon-bini den e famia di AVP.

Comments

comments