“P’ami Alwin Nectar, cu a traha den Cuerpo Policial di aspirant te cu Korpschef, por comprende e frustacion di e polisnan. For di momento cu abo a haci bo escogencia pa drenta CPA, bo mundo a cambia por completo”, asina e ex Altocomisario di Polis a skirbi den un comentario riba e noticia cu e sindicato SPA ta indigna pa e forma diferente cu Gobierno ta trata su empleadonan. E discusion di ken ta “frontliner” a activa hasta Polisnan pensiona, cu a sinti nan mes yama pa sali padilanti y defende nan ex coleganan.
“Tur wowo ta dirigi diariamente riba Bo, durante y despues den Bo ora liber. Locual otronan por haci sin ningun consecuencia abo si no por, pasobra bo ta Shon Polis. Pabo como polis NO TIN NORMAL NOBO, ya cu e ta djis un expresion di moda pa un Polis. Nada no a cambia y lo no cambia pabo y lo Bo tin di sigui wanta tur sorto di insulto, agresion violento, menasa verbal y cu arma contra bo y bo coleganan”, Alwin Nectar a skirbi dirigiendo su mes na e Polisnan cu awor ta den lucha pa ricibi un trato igual y husto for di nan dunado di trabou.
Nectar ta corda cu “Durante di asistencia mi mes a wordo ataca cu cuchiu, biga, yobida di piedra, scupimento den mi direccion y cara door di hendenan hostina, bou di influencia di droga of alcohol. Tin sacamento, pishimento y c…..mento, caminda mi mester sigui haci mi trabou manera nada no a pasa. Ciudadanonan a muri den mi man durante accidente di trafico, matamento cu cuchiu y biga, kedando mi curpa bou di sanger, cu e probalidad grandi di por a wordo contagia cu cualkier enfermedad cu por wordo hiba cas pa mi famia. Ken mi ta? Mi ta shon polis cu tei pa mi pueblo 24/7 pa defende abo, Bo sernan keri, Bo propiedad y interesnan di nos patria cu henter mi alma sin ningun kikmento, angustia, disgusto, rabia of rencor y duda. Mi tei pa yudabo y mi no ta verwacht ni exigi nada pero nada di Bo pa gradicimi pa mi esfuersonan”.
“Ta mi profesion, deber y obligacionnan mi ta cumpli cabalmente cu nan. Mi gradicimento ta esun cu mi mes ta sinti internamente y gradiciendo mi Tata Creador cu mi a yega cas sano y salvo un biaha mas. Brasando mi partner di bida y mi yiunan, dunando nan danki pa e amor y pasenshi cu nan tin cumi. Mi no sa nunca cu lo mi yega cas sano y salvo, ya cu mi por wordo asesina of mal herida durante cualkier asistencia etc.”
“Polisnan Boso ta E First Responder di primera clase y no por wordo compara cu ningun otro organisacion. Ya cu prome cu Covid-19, durante y despues di dje, boso lo tey 24/7. Ami Shon Polis ta solidario cu tur mi compatriota desampara y caminda mi mester entrega y yuda tur sin ningun excepcion, esaki lo sosode. Pero, pero nos tur sin ningun excepcion mester tin un solo meta y un interes comun, cu ta di salvaguardia e felicidad den tur sentido di palabra di nos pueblo, aportando locual nos cada un por. Ami shon polis y tur cu a yega di traha como Polis ta orguyoso di Boso”.
“Pero mi ta urgi boso, pa corda semper riba e dia y momento cu cada un di nos a hura of priminti dilanti di autoridad, nos famia, coleganan, comunidad y mas principal dilanti di nos Creador, cu nos lo tey bou di tur circunstancia pa nan. Nunca nan mester sufri bou di decision di cualkier instancia”, asina Alwin Nectar a termina bisando.
