Ex Altocomisario: Nunca por pone siguridad di Polis na peliger

Riba Facebook por a mira reaccion di ex Altocomisario di Polis, Alwin Nectar, kende ta cuestiona e hecho cu Cuerpo Policial a permiti Ministerio Publico warda e 2.200 kilo di cocaina na un Warda di Polis. Den expresion haci door di ex Altocomisario Nectar, el a sali defende miembronan di Cuerpo Policial di Aruba, kendenan a wordo exponi na un peligro innecesariamente.

Diahuebs anochi Polisnan di Warda di Polis di Santa Cruz a walkout pa mustra nan macontento pa e forma cu ta expone nan y cu Mando Policial no ta tene cuenta cu nan siguridad.

E ex hefe di Polis a bisa den su declaracion riba Facebook, algo cu masha poco e sa haci, cu ningun Warda di Polis ta traha pa algo asina y tampoco ta adecuado, pues pa warda un cantidad asina grandi di droga. “E korpschef hunto cu su staff mester vigila na prome luga e bienestar general di su miembronan. E ta hefe di KPA y no Ministerio Publico, es decir e ultimo palabra di cualkier asunto mirando e embergadura cu por atacha e siguridad di su coleganan, ta di dje,” asina e ex Altocomisario a expresa.

Ley ta pone e hefe di Polis riba e mesun nivel cu cualkier otro hefe di departamento cu mester percura pa siguridad di su hendenan. Pues e ta bisa cu na momento cu Ministerio Publico a bisa cu ta warda e droga na Warda e contesta di Hefe di Polis mester tabata NO, teniendo cuenta cu siguridad di su hendenan.

Hopi ta cuestiona e motibo pakico mester a move e droga, cu ya caba tabata na Marinierskazerne, ora cu el a wordo descubri, pa Warda di Polis. Normal tambe ta cu e droganan di e cantidad aki ta deshaci di nan di un forma hopi rapido, hustamente pa motibo di siguridad.

Roland Peterson tabata e prome Altocomisario di nos pais despues di Status Aparte, sigui pa Lucas “Arie” Rasmijn, despues Alwin Nectar, sigui pa mr. Rolando “Ronnie” Bernadina, Peter de Witte, cu no ta na Aruba, mr. Dolfi Richardson y finalmente algun siman pasa a nombra Andrew Hoo den e funcion maximo den Polis.

Mester bisa cu awe tabatin un bruhamento formal pasobra di parti di Cuerpo Policial Aruba a manda 24ora.com averigua cu Ministerio Publico riba e motibonan pakico no a kima e droga di biaha of ki procedura mester sigui prome cu kima e droga. Ora cu a check cu OM, nan a manda 24ora.com puntra KPA esaki. Pues un bruhamento formal, contal cu e droga a keda sin mama y sin tata!