Aunke cu tabata parce cu e proceso di “screening” ta cla, toch ayera Minister Presidente mr. Evelyn Wever-Croes a manda un carta pa Gobernador Alfonso Boekhoudt presentando un decreto gubernamental (Landsbesluit), pidiendo pa e firm’e, den cual e ta nombra su mes cu tur e encargonan di Ministerio di Infrastructura y Medio Ambiente. Ta menciona cu e lo ta temporal.
Den un carta manda awe mainta ainda pa Parlamento, e Gobernador ta pidi pa haya e pensamento di Parlamento pa awo si e duna Otmar Oduber su retiro inmediato y nombra Evelyn Wever cu tur su encargonan. Te na momento cu Parlamento duna su aprobacion na esaki, e ora numa Gobernador lo bay over na firma e decreto. Mester menciona cu e reunion ta programa pa awe 2:00pm, pero ta porta cera.
Loading…
Reload document 
Open in new tab Mester menciona cu mr. Juan “Ady” Thijsen ta na Hulanda ainda, hunto cu Marlon Sneek, Rocco Tjon, Ricardo Croes, Marisol Lopez y Daphne Lejuez pa atende un charla. Nan a biaha pa un siman, memey di tur e presion cu tin pa pasa leynan urgente cu mester bay na vigor e aña aki ainda y sin lubida pa pasa e mesun nombracion du Lopez-Tromp como Minister.
Manera cu nos a informa anteriormente, Marisol Lopez no tabata Ministeriabel. Por lo menos un di e departamentonan di Impuesto, Siguridad Nacional of Ministerio Publico tabatin problema cu su nombracion y no kier a of no a duna un conseho positivo na Formador. Tanten cu esey no ta regla, Gobernador lo no firma nada.
Sinembargo antayera ainda e mesun Conseho di Minister a manda un relato pa prensa bisando cu Otmar Oduber a atende su ultimo reunion di Conseho di Minister diamars ultimo y a entreg’e un regalo. Den e relato a bisa cu Marisol Lopez lo tuma e funcion over. Pero, toch por mira cu awe Prome Minister a tuma un otro decision, indicando claramente cu no tur asunto ta “na ordo” ainda pa Marisol Lopez asumi e funcion aki atrobe.
Ta menciona atrobe pasobra den pasado, entre aña 2001 pa 2009 el a ocupa e funcion aki caba bou dos periodo di gobernacion di Gabinete Oduber. Berdad cu el a bay na malo e tempo aya, cu e lider catalogand’e como “broedende kip” y despues cu un guera pisa cu e mesun Evelyn Wever. Kico por a sosode entre 2001 pa 2009 cu awor diripiente den tres luna, cu ainda no por caba cu e proceso di screening, ainda no ta conoci.
Tin bosnan den seno di Partido POR a cuminsa expresa cu si ta tanto problema pa haya aprobacion pa Marisol Lopez por bira Minister, cu dicon no ta nombra ex-Polis Alan Howell den e funcion. Di e forma ey San Nicolas lo haya un digno representante den Conseho di Minister. Esaki mirando cu awor aki tin varios reto pa pariba di brug y e mesun Parlamentario ta kehando constantemente di falta di atencion pa pariba di brug, aunke cu mayoria di keho tin di haber cu e mesun maneho di infrastructura cu ta un cartera di POR.
Ta premira cu despues di 2:00pm, ora cu e reunion den Comision Central di Parlamento termina, cu e nombracion oficial di Evelyn Wever como Minister di Infrastructura y Medio Ambiente lo sali tambe. Lo keda net 5 dia mas pa atende e nombracion di Marisol Lopez, pasobra despues di dia 20 di december, Parlamento lo baha cu vakantie y lo no tin quorum pa pasa ningun ley mas, te otro aña atrobe. Probablemente Wever-Croes no kier a core e risico ey y a nombra su mes temporalmente.
