Diabierna tabata eleccion y aki MEP tabata e partido di mas grandi. Pero aparte di MEP como AVP, e otro partidonan cu a logra haya asiento tabata MAS, RAIZ y ACCION21. Awo mester bay mira cua partido lo sinta den coalicion pa forma gobierno.
Prome minister demisionario, Evelyn Wever-Croes, a indica na Hans Geerman, cu nan ta dispuesto pa traha cu tur partido, pero awo mester djis warda veredicto di pueblo. E pueblo a papia cla y nan kier un biaha mas coalicion. Wever-Croes ta enfatisa cu e unico partido nan no lo traha cu ne ta AVP.
Esaki ta bin pa motibo cu e ideologia di ambos partido ta diferente, ya cu segun lider di MEP ta indica cu AVP ta brasa corupcion y MEP ta bringa esaki. E lo lamenta cu si otro partido traha cu AVP, nan lo brasa corupcion. Loke pueblo a rechasa ta corupcion. AVP ta e partido cu nan no lo traha cu ne, y e ta duda cu nan lo por yega otro pa un programa di gobernacion. Un di e leynan cu tin di pasa ta esun di screening, esey ta haci cu asina un parlamentario, ta retir’e. Esey ta algo cu AVP no tabata kier haci ora tabatin un parlamento completo. Nan ta dispuesto pa contempla cualkier otro coalicion y ta wardando pa su encuentro cu gobernador.
A sali riba social media riba ya caba tin un acercamento entre MEP y RAIZ. Pero Wever-Croes a desmenti esey y lo warda riba e ronda di consulta di partido cu Gobernador. Despues di esey e lo apunta un informado, kende lo duna Gobernador conseho kico e ta kere ta miho. Na e momentonan aki e prome minister demisionario ta kere como e unico partido cu experencia den negosha un coalicion, a duna conseho p’e partidonan concentra riba loke ta uni otro. Tin di bay mas den e area di polarisacion, pasobra eleccion a pasa caba. Esun cu kier realmente goberna, ta importante pa cuminsa enfoca riba e parti cu ta uni otro. Segun Wever-Croes, nan a pone un comision cu lo evalua tur programa di e partidonan MAS, ACCION21 y RAIZ. Esaki ta pa alinea nan band’i esun di MEP pa mira con diferente e ta of kico tin den comun.
MEP-MAS
Segun e prome minister demisionario, Marisol Lopez-Tromp, lider di MAS, ultimamente ta brabo ya cu e ataca su persona hopi. P’e mandatario e situacion ta keda mescos, pasobra ora Lopez-Tromp a bandona gobernacion e no tabata kier a presenta reunion pa tres dia largo. Prome minister a yama’e pa papia riba e problema e mes a crea den parlamento, pero Lopez-Tromp no a presenta. Wever-Croes a indica cu e no tabatin problema pa traha cu Lopez-Tromp, pasobra ora e tabata mester cualkier conseho su persona tabata sinta pa papia cu ne.
Pero loke a pasa a pasa, pasobra awo ta wak padilanti. E mandatario no tin problema cu ningun di nan, pa loke ta Miguel Mansur di ACCION21 a trat’e den algun debate. Lopez-Tromp e sa kico e tin na dje ya cu nan a traha hunto. Y Ursell Arends di RAIZ tampoco e no conoce bon aunke a topa otro den debate di dos gobernacion. Pueblo a papia, tin di considera bos di pueblo ta bos di Dios, tin di pone diferencia un banda. Awo mester concentra loke ta uni otro y saca Aruba padilanti.
Pa mas informacion abona riba www.trempan.com
