Prome Minister sra Evelyn Wever-Croes den rueda di prensa di Gobierno Dialuna mainta,
lagando afo e temanan of cosnan cu a pasa cu e mester a reaciona riba nan, a enfatisa cu a
drenta gobernacion cu un vision. Y aparte pa pone orden den e tema finaciero, e tema di
integridad ta un prioridad pa Gabinete Wever-Croes.
Siendo Integridad un tema delicado, bon gobernacion ta algo hopi importante pa un pais. E
mandatario a expresa cu parce cu e palabra integridad den e ultimo ocho añanan cu a pasa
tawata casi un palabra malo pa e gobernacion anterior.
Prome Minister a duna di conoce cu durante Conseho di Minister a dicidi cu lo cana tres
trayecto pareu cuminsando ya awo na januari.
1. TRECE INTEGRIDAD CERDA DI EMPLEADO:
E prome trayecto ta pa trece integridad cerca di cada empleado publico den tur departamento
di Gobierno. Lo establece un oficina di integridad cu lo duna e formacion y cursonan di
conscientisacion pa tur empleado publico ta conciente kico ta integridad y kico bon
goberncacion ta encera. Cursonan aki lo enfatisa e motibo pakico no ta bon pa tuma placa pa
yuda un amigo en cambio di fabor. Pakico no ta permiti cu e motibo cu bo no ta gusta un
hende bo ta pone su papelnan mas abou. Y kico ta e cosnecuencianan. Un di nan lo ta cu lo
por wordo kita for di trabou. E bureau di Integridad lo tin un tarea grandi den
conscientisacion, trece informacion y haci e controlnan necesario especialmente den e
departmentonan mas susceptible pa fraude.
2. CAMARA DI INTEGRIDAD (INTEGRITEITSKAMER)
E Segundo trayecto ta pa bin cu camara di integridad, “integriteitskamer”. Esaki por wordo
compara cu CFT cu awo tey pa controla e finanzas di nos pais. E integriteitskamer lo bay
trata tur loke tin di haber cu integridad. Un ehempel cu Prome Minister a duna aki ta e
destaho publico di Hospital cu desde Parlamento den fraccion di e partido cua Prome
Minister ta lidera, a critica e manera con e destaho aki a bay na unda esun cu tin menos
experiencia y a bid mas halto a gane etc. Den un integriteitskamer esaki ya no ta posibel,
pasobra nan lo scrutina tur aspecto prome cu e deal wordo otorga y e tipo di discusionnan aki
lo no bay tuma luga mas. Aki tambe Gobierno lo mustra cu bon gobernacion ta un prioridad
pa nos.
3. LEYNAN DI INTEGRIDAD:
E di tres trayecto di integridad ta e leynan. Esakinan ta e leynan cu nos falta aki na Aruba pa
garantisa integridad y bon gobernacion. Nos lo cuminsa na partidonan politico. Pasobra ta na
e momento cu e persona drenta un partido politico, e ta drenta e ambito di gobernacion y por
encontre den e situacion di integridad of no integridad. Esaki ta trata di e ley di financiamento di partidonan politico, ley di screening di minister y parlamentarionan, e ley di ombudsman cu ya ta den Parlamento casi cla pa pasa, klokkenluidersregeling, esta e ley pa proteha esun cu ta trece demandanan dilanti tambe ta cay bou di ley di integridad.
“Den otro palabra lo bin cu tur e leynan cu tin mester pa garantisa cu e politico lo tene su mes na reglanan, na bon gobernacion, na integridad como tambe leynan cu ta proteha e ciudadano cu ta trece denuncianan serio di corupcion”, e mandatario ta duna di conoce.
Prome Minister a enfatisa cu integridad tawata un punto di campaña hopi importante pa e
partido cu e ta lidera, esta Partido MEP, como tambe ta keda un punto hopi importante den
nos programa di gobernacion y ya a cuminsa encamina esaki y pronto lo tin tur e leynan aki
vigente.
