Prome Minister Evelyn Wever-Croes a felicita organisadonan y tur esnan cu a uni e fin di siman aki pa yuda esnan den necesidad pa medio di e radio telethon nacional “Happy to give back” cu den 48 ora a logra e suma di 211.461,91. Prome Minister Evelyn Wever-Croes a expresa su gratitude na comunidad di Aruba pa a acudi na a yamada pa haci nan donacion. E placa cu a wordo recauda ta bay pa yuda e fundacionnan; Fundacion Pa Nos Comunidad, YMCA y Fundacion Ban Uni Man Pa Cria Nos Muchanan.
“E bunita di esaki ta pa mira nos hendenan uni hunto na medionan di prensa, radio y television kendenan di boluntad grandi a bin hunto cu CEDE Aruba pa yuda esnan den necesidad durante e crisis di Covid aki. Danki na Top 95 FM, Hits 100, Latina FM, Blue FM, Canal 90, Cool FM, Fresh FM, Heart Radio, Magic FM, Bo Guia FM, Caliente FM, TeleAruba y Elite studios”. Danki pa boso generosidad”, Prome Minister a expresa.
Prome Minister ta recorda nos comunidad cu ta den union so nos lo sali for di e crisis di Covid cu a bati na nos porta 5 luna pasa lagando atras un impacto grandi cu nos pais no a pasa aden prome. “Covid a dal nos pais hopi duro y e ta trece retonan cada dia cu ne, algun mas pio cu otro. Pero e crisis aki a saca tambe e bunita di nos y mi ta gradici comunidad cu a contribui na e radio telethon nacional aki “Happy to give back”. Un danki especial na e organisadonan cu a haci posibel y no a descansa pa 48 ora, a traha hunto y surpasa tur e retonan pa logra esaki. Un bunita ehempel y inspiracion y mi ta sigur cu nos lo sali di e crisis aki tambe si nos uni”, Prome Minister Evelyn Wever-Croes a enfatisa .
