Eutanasia no ta regla den nos leynan y ta castigabel

Tin hende cu den bida nan ta yega na un situacion cu nan mes kier muri. Nan no kier biba mas pasobra nan ta sufri. Na otro partinan di mundo, esaki sa pasa y ta dicidi cu no kier biba mas. Esey nos yama eutanasia.

Anko Ringeling, como director di AZV, ta splica cu e no ta un dokter. Si mir’e di un angulo di ley na Aruba, eutanasia no ta regla den ley. Pero esey ta conta pa mas cos, por ehempel aborto tampoco no ta regla den ley, pero bao di cierto condicionnan tin di compronde cu e ta wordo haci door di dokternan. Esey ta conta tambe pa eutanasia. Por tin cierto condicionnan estricto cu e dokternan ta siguiendo den nan guidelines, cu den cierto casonan, especialmente si e dokter yega na e conclusion cu no tin cura pa cierto pashent, cu bao di cierto condicion, por imagina cu e dokter ta cumpli cu e peticion di un pashent asina, pa yud’e pa na su fase final, na un manera cu e pashent ta desea.

Si esey ta sosode na Aruba y cuanto esey ta sosode, Ringeling no tin bista riba esey. Pa loke e condicion ta cu posiblemente un dokter por facilita e proceso ey, e ta mas miho pa specialmente dokternan cu tin hopi di haber cu pashentnan den an fase final, por ehempel dokternan cu ta trata cancer, oncologonan por ehempel, pa nan por conta kico nan practica ta, kico ta e retonan, mirando cu e leynan na Aruba no ta adecua pa por reacciona riba un peticion asina di un pashent.

Con habri AZV ta

Tin hende cu bo no mester ta den un fase terminal pa bisa cu ta basta. Ora bo ta den e fase terminal ta nifica cu dimes bo ta bay. Pero tin hende cu tin pa añanan largo ta sufri di dolor pero nan no por muri di dje, pero ta cansa.

Segun Ringeling, no ta asina cu mester regl’e den AZV. Si e wordo regla den ley cu e no ta castigabel. Pasobra awor aki e ta castigabel. Si bo yuda un hende pa muri, e ta. Pero si regle den ley cu pa den cierto casonan e no ta castigabel, specialmente si tin un dokter of mas cu un dokter envolvi, si regla esey, locual mester wordo haci, ta wordo cubri pa AZV. E ta un ayudo cu ta wordo duna door di un dokter y e dokter por wordo paga pa AZV. No ta kere cu e problema ta asina tanto cu e no ta cay bao di AZV, den un manera di bisa. Mester hiba un discusion pa cuminsa, pasobra ta papiando tocante un topico cu ta hopi sensitivo den comunidad ainda. Na otro paisnan tin e posibilidad ey caba, por ehempel na Hulanda y otro paisnan.

Den nos leynan esaki no a wordo regla ainda. Tin cu hiba un discusion pa tin un cambio di ley penal, ta parlamento, hunto cu gobierno ta dicidi si ta bin un cambio asina cu ta bay haci posibel pa bao di cierto condicionnan, pa haci un forma di eutanasia.

Peticionnan

Te asina leu no a yega di haya peticionnan asina. Esaki ta wordo papia entre dokter y pashent y famia di e pashent. E no ta necesario tampoco pa discuti esey tampoco cu AZV. Si tin cierto accion, intervencionnan cu dokternan mester haci den un caso asina, e ta wordo paga door di AZV sin cu sa si ta den cuadro di eutanasia of no. Mas importante ta cu e ta wordo regla pa proteha no solamente e pashent, pero tambe e dokter. Awor aki si nan kier yuda mes, nan ta core riesgo pa un castigo penal, pasobra e no ta bon regla.