Arubaanse Voetbal Bond (AVB) a desaroya un plan strategico y ta trahando pa sigui hiba e federacion na e siguiente nivel di crecemento. Cu ayudo y cooperacion di CONCACAF, Arubaanse Voetbal Bond (AVB) a ricibi bishita di Etienne Sillie, develop manager di CONCACAF y a bin pa yuda cu e desaroyo di departamento tecnico di AVB.
Como parti di e plan strategico di AVB, a acorda cu Etienne Sillie pa assisti AVB pa setup e departamento tecnico. Tambe ta intencion pa yega na un technisch beleid plan pa futbol. Por desaroya e programanan, specialmente pa yuda e ekiponan cu nan coachnan pa bin cu un sistema di training general pa Aruba.
Aworaki e plan di AVB ta pa bin cu un technisch beleid plan den 1 luna, asina Reynaldo Geerman, Secretario General di AVB, a indica. Ta kere cu lo keda cla cun’e den 1 luna y asina cu e ta cla por cuminsa implementa e programa di plaso largo, pa e proximo 3 añanan.
Presidente di AVB, ing. Richard Dijkhoff, a invita Etienne Sillie p’e fase unda cu tin un proceso andando. “Nos sa cu Aruba tin su plan strategico y su “Youth Development Program,” asina Etienne Sillie a expresa. Aworaki nan ta bezig pa crea un structura con ta bay anda cu e technische plan, esaki ta algo hopi importante cu e departamento tecnico tin cu carga. E prome encuentro tabata cu directiva, secretario general y ing. Richard Dijkhoff di AVB. Aki el a haya un miho bista kico ta e vision di e Presidente, cu ta bon cla di kico e kier pa Aruba den e proximo añanan.
E fit model cu CONCACAF y Aruba tin tabata igual. Esey tabata facil pa Etienne Sillie por a carga e pensamento di parti di desaroyo di Aruba. A tene un encuentro cu mayoria experto den tecnica di Aruba y aki a trece e plan dilanti. El a sinti cu tin cierto aspecto di e plan cu mester tin un poco claridad, pasobra esey ta importante pa Aruba.
Tin un desaroyo masha importante cual ta global. Esaki ta nifica cu e parti di licencia di club y parti di desaroyo ya caba no tin duda den dje. Tur hende sa caba den ki forma mester bay, cua concepto mester uza, cua direccion. E plan di Aruba ta fit completo den esaki. Ora cu keda cla cu e parti di plan tecnico, e model di Aruba lo yuda engrandece e parti di desaroyo di futbol. E ta un proceso y esaki ta nifica cu mester tin pasenshi. E parti mas importante ta cu e structura, pensamento y modelo ta cla y ta cumpli cu e exigencianan di FIFA y Concacaf.
