Contribuyentenan cu a yega DIMP dialuna mainta, en busca di plachi number cu nan a paga caba, algun di aña pasa december, a sali cu nan mannan bashi. Nan a bandona e edificio di DIMP sin nan number, pasobra ainda no ta cla pa otorga tur e otro numbernan. Lo continua e maneho di partimento den fin di siman via Drive Thru, segun secuencia di number.
A combersa cu diferente persona cu a yega e mainta aki na DIMP, kendenan a mustra nan disgusto. Un ciudadano a bisa cu siguiendo instruccion di e fasenan, a entrega nomber y lista di su vehiculonan via un email for di luna di mei cu te ainda e no a haya contesta riba dje.
El a purba di haya comunicacion / cita cu personal di DIMP pero no a logra y mientrastanto ainda ta wardando riba e plachinan nobo. Esaki ta di tres biaha cu e ta presenta na DIMP y tur biaha e contesta ta igual, cu e tin cu warda pa haya un afspraak pero si no tin comunicacion cu ningun hende ni via telefoon ni via email, no ta keda otro opcion pa presenta y purba haya un hende cu por duna informacion.
Segun e persona aki, e organisacion y empleadonan nan mes no sa con e sistema ta hinca den otro / no a pensa e situacion aki mas leu y no por atende e publico cu ta presenta.
Un otro persona a conta cu segun instruccion riba Facebook di DIMP su number lo ta den e grupo despues di esun di weekend ( cifra mas halto cu 4 Mil ) y pa es motibo e lo por pasa dialuna pa bin busca di dje. Sorpresa cu el a haya ta ora el a yega y nan a avise cu a cancela tur cos. Un rato ta bisa esaki y otro rato ta cambia y bisa full otro, dunando impresion cu ta un wega tin di pushi cu raton.
Ta cumpli cu paga e number na tempo for di comienso y te dia di awe ainda no por haya e number, esaki ta prome biaha den historia cu ta pasa cu ne.
Tambe tin algun persona cu a probecha mientras nan a bin pa algo otro di haci pregunta riba e fecha cu nan lo yega na turno pa ricibi nan plachi.
Hopi ta esnan cu no ta haya e informacion. Tin hende cu no ta riba rednan social y cu esey ta haci cu e falta di comunicacion ta bira un disgusto grandi y ta locual nan ta bin expresa na momento cu nan yega DIMP y haya nan cu e noticia cu nan no ta reparti plachi number.
Tambe por a conta experiencia di un persona cu a pasa diasabra atardi den e fila pa asina haya su number y na momento di yega cas el a tuma nota cu e no tin e plachi chikito. Nan a dun’e e grandi pero pa un motibo of otro esun chikito no ta den locual el a ricibi. A presenta dialuna mainta e ora na DIMP pa wak si nan lo por yud’e cu e descuido di nan banda pa asina e por haya e plachi cu e falta. Aunke e ta remarca cu e experiencia den rij tabata bon y cu no por keha di esey.
