Aña pasa e dos productornan hoben Arubiano Jeon y Steve Andreas a colabora riba un exito cu yama “Pa lante”.
Jeon a laga e artista Alex Sensation scucha e cancion aki cual el a gusta y kier a grab’e. E artista a aserca otro dos colega di taya mundial, Anitta y Luis Fonsi, pa scucha nan opinion tambe riba e cancion “Pa Lante”. Ambos cantante a keda entusiasma y mesora a cuminsa traha riba e proyecto, cu nan a sinti tur e ingredientenan pa bira un exito.
Diabierna mundo ta cera conoci cu e cancion aki y na mesun momento ta lansa e video clip oficial, cu a wordo graba completamente na Miami y den cual e artista Arubiano Jeon tambe ta aparece. Un sorpresa grandi pa habitantenan di Aruba, Boneiro y Corsou ta cu na final di e cancion e artistanan ta bisa den Papiamento “Biba dushi Papiamento”.
Jeon a traha anteriormente cu J Balvin y Anita riba e cancion “Machika” cu a elogio internacional, Steve Andreas aña pasa a triunfa cu su produccion “Latino” cu el a traha hunto cu Chuckie.
Esey no ta tur pasobra otro artista Arubiano, Serghio Jansen, tambe tin su toke poni den e cancion aki. E parti di guitarra tabata na su encargo.
E ta un logro hopi grandi pa e productonan local, cu artistanan di taya mundial manera Luis Fonsi, conoci pa su cancion “Despacito” y Anita (Famoso na entre otro Brasil), ta participando den e produccion aki cu ta bay trece mas exito pa nos Arubianonan cu ta sigui triunfo den exterior.
Nos di 24ora.com kier manda palabra di pabien na Jeon y Steve Andreas.
