Na Aruba parce husticia ta selectivo. E mentalidad Hulandes cu fiscalnan y huez comisarionan cu cultura diferente, no ta contribui na e trankilidad cu pueblo ta desea. Esaki ta un ehempel bibo. Dia 24 di December e homber aki fam Peterson a ser gara cu man den masa hortando na Acqua Condominium. A haye cu otro ladron mas cu pickup full yen di cos horta. A detene ambos. Tristo cu e por sona, pero tres dia despues el a haya su libertad.
Ya e tabata cana los atrobe. Dimes den e proceso prome di su detencion diabierna, sigur el a horta mas caminda te cu Polis a gare. Diabierna el a horta na Beach dos celular y mas cos di un turista. A track e celular y asina a bin haya e cosnan na un Celular Shop na Playa. A gara Peterson cu otro conoci di Polis. Parce cu dia a gare 24 di December anochi, fiscal cu Huez Comisario a bise di lo kier dune ocho dia mas, pero a dune regalo pa habri aña den libertad. Kico huez comisario y fiscal a contribui cune? Na laga un ladron cu ta sigui causa inseguridad den pueblo liber cu caminda liber pa sigui.
Esaki ta motibonan tin biaha cu Polisnan y Recherche ta demotiva. Pa e tipo di decisionnan descabeya di fiscal y huez comisario cu ta traha den forma selectivo. Mientras pueblo ta grita pa seguridad, algun fiscal y huez comisario ta bin tres aña traha na Aruba y nan ta dicidi con e proceso pa tene hende sera ta bay. Si un hende gara e ladron aki y agredie pa defende su mes, e fiscal y huez comisario lo sera e agresor cu e defende su cos, pasobra e ladron ta bira victima. Nos seguridad na Aruba no ta garantiza mientras cu nos ta keda cu e mentalidad di husticia Hulandes cu ta bin pasa tres aña na Aruba sin cu nan conoce e cultura y deseo di e pueblo pa un seguridad.
Seguridad di nos pueblo ultimo añanan ta na merced di fiscalnan y hueznan hulandes cu ta bin cu henter famia traha na Aruba pa tres aña. Peterson diabierna a causa hopi daño na Aruba su turismo. Un ladronicia asina ta subi rednan social y ta mata nos turismo. Spera cu e biaha aki si nan tene e persona aki tras di trali. No por keda cu excusanan cada biaha buscando e buraco pa laga tipo di hendenan asina den libertad cada biaha. Manera laga nan bay ta riba caya bo ta haya nan buscando cos di horta pa cambia pa placa y sasia nan sed di adiccion na droga.
