Escritor Lily Clarisa ta celebra su di dos buki di poesia “Illuminated Darkness”

259

Lily Clarisa ta un maestro di Ingles y ta autor, cantante, escritor y poeta Arubano cu ta biba na Hulanda y lo celebra su buki nobo “Illuminated Darkness” na Rotterdam. “Illuminated Darkness” ta un coleccion di poetria. Esaki ta su di dos buki di poesia, y esun prome ta “Lost Love Poems” cu ta un cronica di su biahenan di amor pa pena di amor.

Lily Clarisa ta un interprete di arte, e ta conoci pa deambula di escenario pa escenario pa recita su arte. El a yega di presenta na e evento “Kosecha Kultural” cu a tuma luga na Corsou, na “Unwanted Words” , “Caribbean Ancestry Club” na Rotterdam, y tambe “Basha Foundation’s Poetry Nights” na Aruba, pa nombra algun. Tambe, Clarisa a yega di participa komo contado di cuenta durante “Aruba’s Children Book Festival 2017”, cual ta organisa anualmente pa “Biblioteca Nacional Aruba”. Su di dos coleccion di poesia, “Illuminated Darkness” ta publica y ta disponibel via AKO, de Slegte y Bol.com. 

E buki “Illuminated Darkness” ta consisti di 3 parti, cual e prome ta papia riba abuso di mucha, drama den famia y soñonan tempo di mucha. E di dos parti di buki ta di PTSD, esta depresion, violencia domestico, amor y odio; e di tres parti ta over paz interno, terapi, amor propio, esfuerso personal y e poder pa cura di naturlesa. Lo ta celebrando e publicacion di e buki dia 5 di juli proximo, cu ta e mesun dia cu ta Clarisa su hacimento di aña.

Esnan cu ta desea di ta presente na e celebracion aki cu ta tuma luga na Worm den Rotterdam, por haya e carchinan na 2.50 euro y ta obtenibel na https://worm.stager.nl/web/tickets of pa mas informacion por bay https://www.facebook.com/events/314023756282511/. Pa por keda actualisa cu Lily Clarisa por haci esaki via su social media Instagram lilyclarisawriter, Faebook lilycalisawriter.