Escandalo sexual abordo di Zr. Ms. Karel Doorman

6156

E barco di marina Hulandes cu recientemente a pasa Aruba, ta den wowo di horcan pa motibo di un escandalo sexual.

Marechaussee di Marina Real ta haciendo investigacion riba un acto di inmoralidad cu a tuma luga den fin di siman tras di lomba abordo di Zr Ms. Karel Doorman. Tin un keho entrega contra un oficial di Marina. Ta trata di mas cu un keho, pa motibo di actonan di tinte sexual den cual e tabata envolvi anteriormente.

Karel Doorman ta staciona for di luna pasa den area di Caribe pa brinda ayudo den cuadro di e crisis di coronavirus na e islanan Hulandes.

E informenan publica ta mustra cu un oficial masculino den e fin di siman a viola un matroos, kende a dicidi di entrega keho. A dicidi di manda dos marechaussee abordo pa haci un investigacion y tuma e declaracionnan. Nan presencia tabata motibo pa e otro dos matroosnan tambe entrega keho.

Despues di e incidente di inmoralidad abordo di zr. Ms Karel Doorman tur e militarnan envolvi a keda abordo y trahando. Segun Marina Real, a tuma e decision aki pa motibo cu e oficial contra kende a haci denuncia ta di gran importancia pa adelanto di e mision. Sinembargo diaranson e mes a dicidi di bandona e barco

Un vocero a bisa cu tur hende por a sigui traha bou di e situacion ey pero e oficial diaranson e oficial a yega na e conclusion cu e no kier keda mas y a biaha hunto cu e marechausseenan cu a haci e investigacion abordo di e barco na Sint Maarten. Su coleganan a tuma su trabou mientras cu su reemplasante lo yega denter di poco.

Luna pasa Zr. Ms. Karel Doorman a pasa Aruba laga un team di militar encarga pa vigila costa. Inclusive a trece ekiponan grandi manera un drone special.