Errol Zebeda: Investigacion ta simplemente pasobra nan kier mi posicion

Errol Zebeda,  Wnd Hoofd Divisie Bedrijfsvoering y miembro di KMT, di KPA ta decepciona cu despues cu dia 9 di augustus, 2018, a habri un investigacion contra dje, te awe niun di su hefenan a bini dilanti pa limpia su nomber despues cu no a haya nada contra dje.

E motibo cu el a dicidi pa e mes bini publico pa duna un splicacion, ta pasobra e ta un hende conoci den comunidad y no por permiti su mes e luho cu ta mancha su nomber, y dañando su carera y riba dje, afectando su famia.

Tabata e mesun Minister di Husticia cu den un conferencia di prensa a anuncia cu a habri un investigacion contra Zebeda di Cuerpo Policial. E carta cu el a ricibi dia 9 di augustus, 2018, ta bisa cu tin un investigacion interno contra dje y a haya prohibicion pa drenta e facilidadnan di KPA. E investigacion tabata relaciona, supuestamente, contra algun acto financiero cu el a haci den nomber di e cuerpo, keho pa su desfuncionamento den Cuerpo Policial, y actonan cu no ta integro como miembro di Cuerpo Policial.

Errol Zebeda: Investigacion ta simplemente pasobra nan kier mi posicion

Errol Zebeda: Investigacion ta simplemente pasobra nan kier mi posicion. Click link pa mas https://24ora.tv/31D9mpN

Posted by 24ora on Monday, August 12, 2019

E carta aki el a ricibi for di sr. Hoo. Su reaccion mesora tabata “ora bo consenshi ta limpi, bo no mester preocupa cu nada”. P’esey el a bisa for di prome instante cu e ta bay coopera. El a entrega di biaha yabi y tur material cu e tabatin di KPA y a informa e funcionario di mas aña di servicio den su departamento, kende a spanta y hasta bira malo. “Mi a bay cas pa laga e investigacion continua.”

Un luna despues den oranan di anochi un auto a yega su cas cu un señora kende ta representa Forensyc Caribbean. El a inform’e cu nan a haya ordo di Minister pa haci un investigacion contra dje, pa cual el a wordo invita pa un combersacion riba prome di september. Nan a mustr’e un listra cu shete (7) punto, haya for di Minister, cu mester investiga. Nan a pidi’e duna su comentario riba e puntonan en cuestion. Pero prome cu esey e mester a duna un les di kico ta KPA, su departamentonan y tarea cu cada un tin, inclusive esun cu e ta encabesa. Esaki pasobra den un di e shete puntonan pa investiga, ta poni solamente di e oficina di ICT cu ta cay bou di “Bedrijfsvoering”. Den e oficina di ICT lo mester tin 4 persona trahando, pero tin solamente 2 pa cual e mes a tuma algun di e tareanan aki over, pa evita presion riba e dos empleadonan eyden.

“Mi no por compronde cu ta papia di desfuncionamento di ICT si pa añanan largo mi a bin ta pidi pa mas personal. Esaki mi no ta compronde, cu nan ta tildami di desfuncionamento di e departamento, si nan no kier dunami personal.” El a recorda cu 4 aña pasa a haci seleccion di algun persona, cu a cumpli cu tur e rekisitonan y cu e no conoce, pero nan no a wordo tuma pasobra a ser bisa cu no tin pura. Riba dje, e coordinador di e departamento a bira malo y a keda 6 pa 7 luna si n traha, cu a manca e departamento atrobe. A keda solamente un trahado, cu mester core riba’baou pa atende cu e problemanan di computer den henter KPA. Mester a busca ayudo di un compania priva.

Un dos pa tres aña pasa a busca candidatonan pa junior ITC, y a logra haya 3 persona pero e documentonan a keda den lachi. Aña pasa e carta a bay finalmente pa nan wordo tuma den servicio. Pero mayoria a haya trabou “pasobra niun hende ta sinta warda un tres aña riba un funcion. Pues te ainda nos tin e mesun dos personanan cu ta traha den oficina ICT, di cual un di nan ta malo”.

E di dos combersacion den e investigacion di Forensyc a tuma luga te dia 22 di october. Den e combersacion ey e mester a splica con ta traha presupuesto, con e forma di compra di material ta bay (e canalnan cu ta cana); e maneho di laptop den KPA, sistema di automatisering; caha placa chikito con e ta wordo uza, con e procedura di e autonan di patruya ta bay. Despues nada mas.

Na januari ultimo el a haya un invitacion di Hefe di Cuerpo Policial sr. Hoo pa un combersacion y ey el a wordo informa cu no tin motibo mas pa prohibi’e entrada y e por cuminsa traha, pero como su consehero, pasobra investigacion no a caba ainda. “Mi a bay di acuerdo, pero mi a bis’e cu e investigacion mester caba si pasobra e no por keda algo cu ta flota den aire. Y mi a pidi pa saca un KM (Korps Mededeling) pa e ta cla pa tur hende kico ta pasando, cu mi ta cuminsa traha y di con.”

Pero eynan no a “clear” mi nomber ainda. E mesun luna el a manda un carta pa Minister di Husticia informando cu e ta kere cu e investigacion mester caba, y di un bon manera. El a pidi tambe pa pone riba papel tur medida cu el a tuma pa tin un bon control financiero; loke a haci pa auto daña keda menos tempo den garashi; kico el a haci ora cu dos funcionario a bay na disposicion di Minister na aña 2017 sin entrega relato ni placa y medida cu el a tuma ora cu un funcionario a otorga un trabou na un compania pa 1.4 miyon florin sin entrega e material na KPA. El a pidi e Minister pa hinca esakinan tambe den e investigacion, pero e Minister no a contest’e.

E mes ta bisa cu desde cu a anuncia e investigacion, el a tende asina hopi cos cu e lo a haci, entre otro tuma auto di ilegal. “Te awe ainda mi ta bay cas, ta cana paden y pafo tratando di pensa cu si mi a haya placa ta unda mi lo a sconde pasobra mi no ta corda nada asina. Hasta mi señora a puntrami pasobra e unico placa cu e ta wak drenta ta esun di mi salario. Tur e cosnan aki ta bini di un mente hopi maligno.”

Tur loke cu tin tras di e sucedido aki, e ta sinti, ta e funcion cu e ta ocupa. Esta pa esaki keda liber pa e wordo ocupa door di un otro persona. “Esaki aparentemente pasobra bo por gana cen cu e funcion ey, di manera ilegal. Basta tempo nan ta haci intento pa halami di e stoel. Tur loke cu mi ta haci, ta poni preto riba blanco, mi no ta bay reunionnan mi so, y ta traha relato. No tin nada dudoso den loke mi ta haci.”

El a dicidi di bini dilanti pasobra ya un aña a pasa, a causa daño na dje, pero e hendenan cu mas a sufri den e caso aki tabata su famia. Pa nan mi ta bringa. Mi a studia y ta entrena pa deal cu falsedad, pero mi famia a sufri pa e actonan di mala fe y falsedad. Mi kier pa e asunto aki wordo regla. For di aña pasa tabata cla cu no tin nada. Y esey ta confirma ora cu a lagami bay traha.” El a pidi e Minister pa pone riba papel resultado di e investigacion, y den forma hopi cla pa su nomber wordo aclarea y su famia keda trankil. E asunto aki a afecta hasta su yiu cu su resultadonan na scol a bay atras y mester a busca ayudo profesional pa su famia. Y un aclaracion ta na su luga pa trece stabilidad bek den su famia. “Mescos cu a sali cu diferente declaracion, bin bek awo y bisa cu no tin nada. Mi a traha cu alma y cuerpo pa KPA y hasta neglishando mi famia. Mi ta stima KPA y mi trabou. P’esey mi  no ta contento cu e acto di falsedad contra mi persona.”

Comments

comments