Ernst & Young a faya investigando Endy Croes

Corte di Casacion na Den Haag, e ultimo instancia unda un ciudadano of un compania por acudi ora cu partidonan no por yega na un acuerdo, a rechasa ponencianan di Ernst &Young y a conclui cu nan no a sigui reglanan internacional, cu ta encera cu mester a scucha Endy Croes, e tempo aya Presidente y despues Director di Fundacion Lotto pa Deporte (actual Parlamentario di MEP) den e investigacion di su maneho pa cu fondonan y haci negoshi cu su mes of su famia cu placa di Lotto pa Deporte. Un decision asina lo ta pa celebra pa mayoria. Pero e pregunta ta keda: Endy Croes tin motibo pa celebra?

Ernst & Young dia 20 di januari 2010 a haya e tarea pa investiga maneho irregular di miembronan di directiva di Fundacion Lotto pa Deporte. Pa Endy Croes e investigacion no tabata completo pasobra no a cumpli cu e regla di oro “hoor en wederhoor” y a bay Corte contra nan. El a gana e caso den Prome Instancia y e dos otro biahanan cu Ernst & Young a apela decision di prome instancia y Corte Comun di Caribe Hulandes, nan a perde e caso. Pues tres Corte a conclui cu e compania aki a comete un violacion serio di reglanan cu nan mester tene cuenta cun’e ora di haci un investigacion administrativo.

Pero e caso aki ta bay mucho mas leu. Investigacion Fundacion Lotto pa Deporte tin tres direccion cu a wordo tuma. Prome tabatin retiro di Endy Croes como director di e Fundacion sin ningun compensacion, debi na e mal maneho. El a bay Corte cu esaki y a perde den tur tres instancia, pues te na Hoge Raad. Pues su retiro ta keda valido y sin ningun compensacion. Corte a basa nan mes riba e rapport di E&Y pero tambe cu Croes no a contradeci suficientemente e ponencianan di e rapport cu a bin yena di prueba di transaccionnan dudoso y cu ta liga na nepotismo y corupcion!

Loader Loading...
EAD Logo Taking too long?

Reload Reload document
| Open Open in new tab

Download [115.90 KB]

A cuminsa un investigacion penal contra Endy Croes, pero pa motibonan cu ta wordo cuestiona te dia di awe, Ministerio Publico (PG Pietersz a tempo aya) a dicidi di pone esaki un banda pa laga e otro procesonan cana nan caminda. Un decision inexplicabel ya cu e motibonan pa cu esaki cu no tin conexion cu e otro casonan, ya cu e aspecto penal ta algo totalmente los di casonan civil. Ta den e cuadro ey Landsrecherche a laga cer’e pa motibo di corupcion, mal maneho y enrikese su mes of su famia.

Endy Croes mes a cuminsa un caso contra e compania Ernst & Young pa violacion di regla di oro di no a scucha su persona debidamente ora cu a haci nan investigacion riba supuesto malversacion of otro actonan ilegal den maneho pa cu Fundacion Lotto pa Deporte. Den esaki den tur tres instancia e decision tabata na fabor di Endy Croes.

Celebrando resultado di e caso civil cu a gana Ernst & Young te na Hulanda.

Croes a wordo nombra Director General di e Fundacion dia prome di April, 2009. Dia 4 di januari, 2010, directiva di e Fundacion, debi na indicacionnan di iregularidad den maneho financiero, a pone riba non actief. Aki ta unda Ernst & Young a haya e tarea pa investiga e iregularidadnan, di mal uzo di e recursonan financiero, segun reglanan di NIVRA. Den e caso aki Endy Croes a pidi pa Corte declara cu Ernst & Young a haci nan mes culpabel na un acto illegal contra dje (door di no scuche den e investigacion) y door di esaki el a perde su trabou y no a logra haya un otro trabou. Hof solamente a dun’e razon cu e no a wordo scucha, pues a comete un acto ilegal contra dje.

Cassatie den su decision ta bisa tambe cu si keda proba mes cu E&Y a comete un acto ilegal contra Croes, e no ta nifica sin mas por conclui cu esun cu sufri daño E&Y ta responsabel civilmente pa esaki. Na Aruba mes no tin regla manera di NIVRA, norma y reglanan pa Accountantonan haci nan trabou. Mas serio y grandi un investigacion ta, mas mester tene cuenta cu interes di e otro Partido. Den e caso aki e trabou di Croes tabata na wega y e rapport tabata contene masha hopi documento. Den e caso ey, Croes mester a haya un copia di e rapport y no solamente “inzage”, segun Hof a bisa den su decision.

E rapport final tabata un combinacion di un forma no completo di e practica di “wederhoor”, algun cosnan no corecto y algun duda. E combinacion di factornan a conduci cu den e rapport final por surgi un imagen mas negativo cu loke ta wordo hustifica cu hechonan.
Den e caso Hof a bisa cu no ta bay pa si e hecho inhusto a causa daño. Pa duna Croes razon solamente mester ta existi e posibilidad cu e por a sufri daño. Y esey ta e caso. Y esaki ta e mesun conclusion cu Cassatie a yega na dje.

Y awor? A keda proba cu E&Y a actua di un forma inhusto pa cu Endy Croes. Pero nan ta responsabel civilmente pa e daño sufri? Esaki ta otro caminda cu Endy Croes lo mester cana pa mira si e por saca un compensacion for di e compania di Accountant, pero mientrastanto e tin un trabou nobo como Parlamentario. E decision den e caso civil aki, no tin influencia riba e caso di daño y perhuicio cu el a pidi pa cu su retiro, pasobra Corte mes a bisa cu e no a duna suficiente splicacion riba e ponencianan, den Corte, riba e motibonan di su retiro.

Pero e caso aki tampoco ta bisa cu Endy Croes ta inocente den e investigacion penal cu Ministerio Publico a dicidi di no sigui cune. Solamente e ta bisa cu NO a permiti den un forma mas husto duna Croes chens pa REACCIONA riba loke cu a saca afo den e investigacion administrativo. Tampoco esaki ta nifica cu automaticamente si a dune e oportunidad pa reacciona riba e rapport contra dje, cu esey lo a cambia e angulo final di e rapport. Ta djis cu e compania a comete un eror barbaro di no a duna Endy Croes un oportunidad husto pa defende su mes di tur e acusacionnan di corupcion/mal maneho cometi tempo cu e tabata na timon di Fundacion Lotto pa Deporte.