Eric Ras (CURPA): Partido MEP a mata ReD caba awo falta RAIZ

No por yega na ningun otro conclusion cu temporada di campaña ta na caminda ora gobierno anuncia cu ta bay pidi permiso na Merca pa a traves di OPEC haya crudo na prijs preferencial. Nos por corda tempo cu partido MEP tabata den oposicion, minister Glenbert Croes tabata bati riba su pecho cu ta MEP a yega na un acuerdo cu Citgo pa bin habri e refineria. Asina e mesun persona aki a primiti di baha edad di pensioen y tambe e prijs riba awa y coriente. Despues cu partido MEP a drenta gobierno nan a core cu Citgo, pero tambe a regala Citgo 175 miyon dollar y awe nos ta sinta cu refineria cu ta cay den otro. Nos por corda Quanten Consortium Aruba LLC y Eagle LNG su interes pa inverti 3.5 biyon di dollar na Aruba, pero despues tur cos a cay na awa y a keda e lego plan di Eagle LNG.

E comportacion eratico di partido MEP no mester ta un sorpresa pa nos pueblo. Nos conoce partido MEP cu ta gusta hunga cu sentimento di nos pueblo p’asina logra nan metanan y nan lema ta keda “campaña ta un cos y ora goberna ta dal pueblo cu medida”. Nos por mira cu gobiero aki no sa kico mas pa haci y ta haci saltonan mortal. Awo cu e gremionan comercial a lanta fo’i soño cu e aumento riba tarifa di awa y coriente, gobierno ta su so para. Unda cu e gobierno aki bira gobierno ta topa cu problema cu e mes a crea. Nan no ta bin cu solucion y nos situacion ta empeora. 

Partido MEP no sa kico pa haci mas y ta bin cu tur sorto di invento. Tur nan argumento a caba y locual cu ta warda nan, ta un derrota fulminante den e proximo eleccion. Partido RAIZ, cu ta gelijm cu bison kit tambe ta bay den nos historia pa ta e partido cu mas poco a dura den un gobierno. Politicamente partido RAIZ mes a coba su propio graf. Despues cu MEP a mata partido POR y RED awo a yega turno di partido RAIZ. Si nos bay bek den historia nos por corda cu na aña 2001 partido MEP a campaña cu Aruba ta failliet. Partido MEP a drenta den gobierno na 2001 y despues cu a campaña cu Aruba ta failliet a redobla nos debe nacional. E tempo ey via nos banconan local a subi mercado internacional pa fia placa riba interes halto. Claro ta pueblo lo mester paga.  Awe den 2022 e gobierno di MEP aki ta cosecha di ta parti di e debe gigantesco cu nan tambe a yuda hinca aden. Un debe di riba 6 biyon florin.   

Nos situacion financiero ta desastroso y esaki ta danki n’e partidonan cu a goberna nos isla for di tempo Aruba a haya su Status Aparte. Aruba a goza di un boom economico pero te dia di awe nos finansa tabata mal maneha. Awe nos ta hopi leu fo’i  cas. Partido CURPA ta kere cu ayudo y cu sabiduria di Dios nos lo pone Aruba bek riba pia. Pa hende e situacion ta mustra imposibel pero no pa Dios. Partido CURPA su confiansa ta den Dios y cu Dios lo duna nos sabiduria pa sali for di e desaster aki. 

Ningun di e partidonan politico cu a vota pa ley cu ta contra leynan di Dios lo tin solucion pa nos situacion. E partidonan aki a apoya maldad y awo kier pinta tur cos bunita cu nan si tin solucion. Maldad ta trece miseria y esaki nos pueblo di Aruba ta bib’e awe. Di e 36 aña di nos Status Aparte Aruba no por sinti su mes orguyoso alcontrario  sino un berguensa paso pueblo di Aruba ta ariba rudia y a perde su Status Aparte ora a firma coho dia 13 di november 2020. A hiba Aruba prome cu 15 di december 1954 tempo cu firma e Statuut.