Gobierno parce di a uza un barita magico pa transforma nos presupuesto 2023 for di un deficit pa un surplus. Pregunta ta si e barita magico lo bay tin repercusion negativo p’e gobierno, pasobra a trece cambio riba e presupuesto sin mand’e Raad van Advies pa conseho.
Pa colmo gobierno no a presenta un presupuesto confiabel e ultimo cinco aña gobierno. Ta pues logico cu gobierno no ta gosa di credibilidad y no ta di confia. Ora cu CAft bay revisa e presupuesto lo bay pasa mesun cos cu presupuesto di 2021 y 2022. Durante e ultimo 5 añanan no a bin un presupuesto balansa. A crea debe riba debe. Hulanda a cera porta pa prestamo na gobierno y locual cu gobierno a haci ta bira mal pagado y hinca nos comerciantenan den problema financiero. Tambe gobierno a pluma nos companianan estatal hincando nan den problema financiero. Awor kier mata e galiña cu ta pone e webo di oro y ta bin cu mas medida riba nos turismo. Nan ta bin pa disfruta di nan vakantie y no pa wordo masacra.
Despues di aumento barbaro riba prijs di awa y electricidad kier bin cu e BBO na frontera. Efecto aki no solamente lo cay pisa riba lomba di nos pueblo pero tambe lo caba cu e importadornan y lo pasa despues pa rebendedo. Pueblo no tin espacio mas pa mas medida paso ya caba pueblo ta den miseria. Nos problemanan social a aumenta y te dia di awe gobierno no ta trece solucion y cada dia cu pasa e situacion ta bira pio. E unico pilar economico cu nos tin ta core peliger. Un planta di purificacion na Bubaliplas cu no ta importante pa gobierno. For aña pasa a publica un rapport di urgencia cu tin encuanto e planta di purificacion aki. Despues di un aña ainda gobierno ta sinta man crusa y e situacion ta hopi mas pio cu aña pasa.
Gobierno a introduci cu empleadonan publico lo ta paga a base di rindimento anualmente. Esaki ta e acuerdo cu ta hancra den coho. Un medida paso gobierno no kier baha gasto riba empleadonan publico, pero a sigui tuma hende den servicio. E mal maneho aki tin awe cu nos cuerpo policial y otro departamento di gobierno no por recluta mas personal. Un cuerpo policial cu ta onderbezet y pa di 6 biaha no tin opleiding pa polis. Siguridad di nos pueblo no ta conta. Cu e prestatiemanagement aki gobierno a cuminsa un guera cu e empleadonan publico cu si ta traha. Gobierno den ultimo 5 aña aki a sigui tuma hende den servicio di gobierno. Riba dje hendenan cu cobra un salario barbaro pa haci nada y riba dje ta cobra e 25% di toelage. No keda sorprendi ora e empleadonan aki uza e barita magico contra di gobierno.
Nos por a scucha cu scarsedad di cuminda ta aumenta. Hulanda tin minister di stikstof pa kita tereno di agricultornan y asina aki kita cuminda di su mesun pueblo. Pa nos di partido Curpa esaki no ta nada nobo paso e ta hinca den e puntonan di desaroyo sostenibel. Si e gobierno Hulandes no ta worry cu su mesun pueblo nos lo no spera di haya yudansa di Hulanda. Akinan ta nos como pueblo mester yuda nos mes paso ora situacion bira mas preta, y esaki ta un hecho, nos mester sa kico pa haci.
Nos tin un parlamento cu no ta funciona y ta tira lodo riba otro. Un berguensa cu un parlamentario ta presta su mes pa un insinuacion asina baho. Un berguensa total. E cosnan aki ta pasa ora cu bo tin maldad den bo curason. Arepenti y pidi Dios pordon y cuminsa di nobo. Nos sa cu e situacion aki ta rond di mundo. Gobierno y nos parlamentarionan no tin solucion y ta husga e gobierno anterior mientras ta nan a bisa cu tin tur solucion. Un gobierno di mentira. Nan kier haci comosifuera nan ta Dios. Nan mester spera locual cu ta na caminda pa nan. Nan a sembra maldad y nan lo cosech’e.
