Nos prome minister tabata na Hulanda y a bisa di a reuni pa trata di evita e decreto real, pero tur cos ta mustra cu no tin nada oficial a tuma luga. Tur cos ta mustra cu decreto real ta keda riba mesa y dia 26 di augustus 2022 nos pueblo lo haya sa si ministerraad den su totalidad lo haya e decreto real cu mester considera cu gobierno ta incapaz pa goberna nos Aruba dushi tera. E potret di nos prome minister y prof. Gradus cu a sali publica den prensa ta bieu.
Aruba ta bayendo den direccion robes y nos situacion ta empeora cada dia cu e gobierno aki ta na poder. Pa falta di un maneho awe e gobierno aki a destrosa nos pais. Aruba ta manera un barco cu ta sink y yen di matroos a cuminsa bula afo pa no sink hunto cu e barco. Nos problema mas grandi ta cu nos gobierno despues di a gaña nos pueblo durante campaña di tin tur solucion awe no tin ningun solucion. Nan por hala ningun pion paso nan mester hala cada biaha nan decision cu nan tuma atras.
Mientras tanto pa falta di vision nos Aruba dushi tera ta move manera un cangreu. En bes di bay dilanti nos ta bayendo atras. Un gobierno di signatura geel cu den e ultimo 5 aña no a bin cu ni un proyecto cu lo por trece entrada y empleo pa nos pueblo. Mas negoshi ta cerando pa via cu costo di bida ta asina halto y nan no por sobrevivi.
For di aña pasa ex-director di WEB NV a pidi pa gobierno permiti WEB NV hedge y hasta cu si mester, permiti WEB NV aumenta tarifa di awa y electricidad. Gobierno mientras tanto a drumi y ora cu e reserva di 150 miyon a desaparese no a keda WEB NV nada otro di aumenta tarifa di awa y electricidad. E mal maneho aki a hiba nos compania WEB NV den un problema financiero y nos tin un minister cu ta papia disparate na e comerciantenan cu den futuro lo baha e prijs bek. E tarifa di awa y electricidad lo baha den futuro, pero no bou di e gobierno aki. E gobierno aki ta pio cu packman. Tur cos cu ta den nan caminda nan ta come y no ta corda riba ningun hende. E hende ta central!!!!!! Lubida.
Aruba a keda pega den tempo paso e unico cos cu e gobierno a haci ta saca sanger bao di huña di nos pueblo. Unda cu nan a mishi nan a daña. Manera cos ta pinta nan no ta interesa den bienstar di nos pueblo. Un Aruba cu no tin placa kier sigui crea mas departamento pa hinca amigo y famia. Mientras tanto e presupuesto tin un deficit di riba 200 miyon florin y lo no haya prestamo for di Hulanda. E mal maneho a pone no solamente gobierno sino henter pueblo di Aruba ta lomba contra muraya. Nos como Arubiano no por bati riba nos pecho cu nos mester sinti nos mes orguyoso, alcontrario nos mester sinti nos mes decepciona di tin un gobierno asina. Awe nos por bisa cu nos gobierno ta manera nos bisiña esta esun pazuid aki. Unda e partidonan socialista/comunista ta na poder tin miseria y ta manera cu fierno ta aki bou mes. Danki Dios pueblonan rond mundo nan wowonan a habri y ta lanta para pa nan derecho.
Pueblo lo bay haya e oportinidad pa vota pa un cambio y nos mester uni pa para firme contra di Hulanda pa nos por salba nos Aruba dushi tera. Hulanda semper a trata e islanan aki manera colonia y ta probecha di e gobiernonan cu a hinca nos den e situacion na unda nos ta. Nos gobiernonan nunca a traha un dam pa awe nos tin un reserva. E gobierno aki a destrui bida di nos pueblo cu mentira, pero pueblo tum’e manera un prestamo pasobra e lo bin bek cu interes. Si bo ta den e luga di influencia y no ta haci uzo di poder pa para pa e berdad y bo no ta hacie anto ta pica. Nos tin parlamentario cu ta bisa cu ta Cristian pero ta demostra cu nan color politico ta bin na prome luga en bes di nan FE.
Lider di partido Curpa Eric Ras
