Den e prome articulo tocante Colegio Arubano, fecha 5 di juni, mi a tira un bista riba e desaroyonan relaciona cu e composicion di e directiva di SMOA, di cual su periodo di encargo a finalisa fin di mei. E reeleccion rapido di e presidente di SMOA como representante di comision di mayor a hala nos atencion.
Nos a wak e retiro di e representante di obispo den directiva como un señal cla. Tur es tempo nos tin entendi cu a nombra dos miembro di directiva nobo. Obispo no a haci uzo (ainda) di e derecho di nombra un representante den e directiva. E pregunta ta si obispo lo haci esaki ainda. Interesado-, docente-, mayor-, alumnonan y directorado di scol ta spera riba un declaracion di obispo. Probablemente, esaki no lo tarda mucho mas. Mi ta spera cu e contesta di obispo ta conforme cu e acuerdo di cooperacion di Diocesis y SMOA, fecha 8 di october 2013. A firma e acuerdo poco tempo despues cu a modernisa e statutonan.
Cu tur confiansa, Diocesis kier a deshaci di e posicion di poder cu e tabatin durante e añanan, y conforme tempo laga espacio pa e laiconan tuma responsabilidad di enseñansa riba nan mes. Diocesis kier a mantene su identidad si. E acuerdo ta tene na cuenta e fundacion Catolico Romano for di su inicio na aña 1959, y ta habri pa tur denominacion. E preguntanan “ken nos ta como scol” y “kico nos ta defende”, tambe mester ta contesta pa medio di e mesun identidad. Como ultimo punto den e nuebe consideracionnan pa cooperacion entre Diocesis y SMOA ta para cu “mester duna espacio na e construccion dinamico na Colegio Arubano, cu ta resultado di tanto proceso interno como social den e organisacion di scol ,como interaccion di e scol y cu tur loke ta rondon’e.” Mi ta spera cu obispo lo reacciona na e manera adecua, despues di scucha e partidonan y constata cu varios punto den e acuerdo di cooperacion ta representa particularmente e scol y unda e procesonan interno y social ta obstaculisa.
Con e puntonan ariba menciona ta relaciona cu e situacion actual? E docentenan di Colegio Arubano ta conclui den nan articulonan cu e problema entre directiva y e docentenan tin di haci cu e actitud di interferencia continuo door di directiva den e asuntonan diario di scol. Esaki lo causa stress excesivo y innecesario te na e nivel cu nan ta considera scol como un lugar di trabou insigur y cu ta stroba crecemento y desaroyo. Posiblemente, e rector tambe lo a experencia e falta di espacio, stress excesivo y innecesario te na e extremo cu el a tuma su retiro. Finalmente, mi ta probecha e oportunidad pa señala otro proceso interno. E ultimo fecha pa solicita pa e vacatura di rector tabata 6 di juni. Directiva y docentenan no ta riba terminonan di dialogo. No a inicia cu ningun procedura pa e formacion di un comision di seleccion. Semper tabata e custumber cu representante di cuerpo di docente, personal administrativo y directorado di scol hunto cu un adviesbureau tabata forma parti di e comision di seleccion.
Nan ta haci un nominacion pa medio di un protocol y segun conseho di e adviesbureau. Esaki ta forma parti di un di procesonan interno cu nos a discuti anteriormente. Pa e siguiente nominacion ta diferente, ya directiva mester a comunica esaki na e gruponan interesa. Sinembargo, no ta prudente pa cualkier directiva bou e circunstancianan aki nombra un rector sin niun forma di participacion di e docentenan, directorado di scol y personal administrativo.
Ignora esaki lo traha net lo contrario y lo haci historia ripiti su mes.
